أقوال تاريخية مأثورة | خذوا الحكمة من على ضهر التكاتك

كيْفَ لي أن أقتنع؟!

 

 

أثناء مروره بين صفوف الطُلّاب قال المُعلِّم لتلاميذه ناصحاً:

-       وبيقول الحكيم : "لا تَقُلْ: فَعَلْتُ؛ حَتَّى تَرْضى بِما فَعَلْتَ .. ولا تُقْبِلْ عَلَى شَيْءٍ؛ حَتَّى تُؤْمِنَ بِهِ" .. يعني ما تقولش إنك عملت حاجة إلّا لمّا تقتنع فعلاً إنك عملتها على أكمل وجه وتكون راضي عنها .. وما تبدأش تعمل حاجة إلّا إذا اقتنعت بيها وآمِنت تماماً إنها مظبوطة .. مفهوم يا ولاد؟ .. تمام .. واجِب النهار ده إنكم تكتبوا الدرس ده مرّتين وتجاوبوا على أسئلة الفصل الرابع كلّه .. ماشي؟ .. يلّا انصراف ع الفُسحة.

وفي اليوْم التالي رفعَ تلميذٌ إصبعه فإذن له المُعلِّم أن يتكلّم فقال الولد وهو يختنق بعبرات الحُزن:

-       حضرتك يا أُستاذ قُلت لنا ما تعملوش حاجة إلّا لمّا تقتنعوا بيها .. علشان كده أنا ما عملتِش الواجب .. أصلي مش مُقتنع باللي مكتوب ف الكتاب:

# الكتاب بيقول إن بلدنا غنيّة .. بس احنا فُقرا وبناكُل ونلبِس ونتعالج ونتعلِّم بالعافية.

# الكتاب بيقول إن بلدنا مُتقدِّمة .. بس احنا مش كده وعايشين على الأجهزة والاختراعات اللي جايّة لنا من بلاد برّه .. وأكلنا ملوَّث وفيه ناس بتشرب م الترعة.

# الكتاب بيقول إن بلدنا مليانة غاز طبيعي بنصدّره لبلاد تانية .. بس أمّي بتطبخ على الحطب وأقراص الجِلّة.

# الكتاب بيقول إننا بلد التاريخ والحضارات .. بس احنا مش بنحافظ على آثارنا وحضارتنا القديمة وأغلب تصرُّفاتنا همجيّة.

# الكتاب بيقول إننا بلد الأديان والأخلاق والأمن والأمان .. بس ما بقيناش ملتزمين بالدين ولا بالأخلاق وشوف بقى عندنا أماكن قد إيه بتبيع خمور وفيها رقّاصات وجرائم كتير.

# الكتاب بيقول إننا بلد الحُريّة .. بس احنا عندنا مساجين ومُعتَقلين كتير وممنوع علينا نتكلِّم غير ف الكورة والفن وبَس.

# الكتاب بيقول إننا بلد البطولات والأمجاد .. واحنا مش عارفين نرجّع أرضنا ولا عارفين ندافع عن اخواتنا المظلومين وبقينا ملطشة للي يسوى واللي ما يسواش.

يا أستاذي العزيز: نحن نعيش واقع الزيْف والزور لمجتمع الغِش والتدليس في وطن الكذب والخداع.