تذاكر يا هانم .. تذاكر يا بيه
مسارح .. وسيما .. وسيرك وأفيش
وصورة المنيّل .. وكاب الشاويش
وكلب الحراسة .. وكرسي الرياسة
وحبّة سياسة .. وطربة حشيش
تذاكر يا هانم .. تذاكر يا بيه
ح تدخل بعيّل تحاسب عليه
جميع اللي ماتوا عيالي الصغار
جميع اللي عاشوا ملوك القمار
تدخن يا باشا سجاير بهاش (حشيش Hashish)
وتنسى اللي ميّت وتنسى اللي عاش
وتقلع هدومك وتلبس همومك
وتاكل سمومك بكل انتعاش
تكيّة بَهية وكُشك السعادة
و دمِّك يا حلوة يا سكر زيادة
وصرخة بناتِك وشرخة بياتِك (البياتي هو مقام
موسيقي شرقي معروف بالشجن والحزن)
شهادة وفاتِك في حالة عبادة
عَزيزي المواطن .. عَزيزي الفَقير
آمالَك في بُكرة بتنقَص كتير
بِتنقَص بلادك أراضي وبيوت
وتنقَص ولادك تابوت فوق تابوت
حَياتك يا فندي حياة ما تساويش
ف إيه اللي يجبر جَنابك تعيش؟
دا بينك يا باشا وبين الحياة
حواجز وشيش خلف شيش خلف شيش
سيناريو العجايب عجيب العُجاب
تموت البراءة وتحيا الكلاب
وتصنع مهازل وتهدِم منازل
وتعمل عوازل ما بين الصحاب
أتاري اللي ميّت قتيل الغرام
واتاري البلد دي بتهوى الكلام
وتهوى البنادق وتهوى الخنادق
وتهوى اللي صادق في صورة عضام
تذاكر يا هانم .. تذاكر يا بيه