خذوا الحكمة من على ضهر التكاتك
إليكم أيها السيدات والسادة أهم الحكم والأقوال المأثورة للمصريين في آخر الزمان والتي تم تجميعها حصرياً من آلاف الميكروباظات والتكاتك ولا مؤاخذة :
- لو حد طلع زبالة اعمل له قرار إزالة.
- شوية عاهات افتكروا نفسهم حاجات.
- زى ما فيه شامبو ضد القشرة فيه صحاب خانت
العشرة.
- مالكش دعوة بالناس .. دول لو شافوك مشنوق ح يقولوا عليك بتتمرجح.
- الصاحب الجدع مالوش مرتجع.
- لو فاكر نفسك أحسن مني ح خليك في يوم تيجي
تقول لي علمني.
- تكسب حب الناس بسهولة .. لو فيك طبع
الرجولة.
- رميت همومي في البحر طلع السمك يلطم.
- الميكانيكا أداء مش شد أجزاء.
- يا اللى انت زعلان منى ومخاصمنى .. على
وضعك ولا تشغلني.
- طول ما التلاجة مفيهاش حاجة إشتغل أي حاجة.
- اللي عدى البحر ف سفينة نايم .. غير اللي
عدى وسط القروش عايم.
- الرجولة ضرب نار مش هزار.
- ح تعرف الحقيقة وقت الضيقة.
- سهلة ومش مستاهلة.
- خلصانة ومعاها حصانة.
- يا ناس أنا مخي باظ .. ح اسيب
التكنولوجيا واركب ميكروباظ.
- اللي كانوا تلاميذنا.. فاكرينّا عجّزنا.
- الرجولة فُرص .. مش عجوة وقُرص.
- تعيش راجل تموت راجل .. يموت جسمك يعيش إسمك.
- هات آخرك ومش ح اكلّمك ولما تخلّص ح اطلع اعلمك.
- حرّك شفايفك عشان مش شايفك.
- يا تخليك قد كلامك .. يا تخلي كلامك على
قدك.
- مش ح اقول كلام كبار عشان الكبار مابيتكلّموش.
- المشي البطال ياما بهدِل أبطال.
- الدنيا دوامة ومفيش عوامة.
- الرجولة مقامات ماتتحطش على سيديهات.
- إن خَس جسمي ما يخسش إسمي.
- تجيب سيرتنا تدفع غرامة .. لو مش مصدّق اسأل
ماما.
- عامل صاحبك وحبيبك .. وف ضهرك إنت ونصيبك.
- إمسك لسانك يعلى مكانك .. وخلي سكوتك يوجع
أكتر من كلامك.
- لو انت بابا ف المجال .. ف انا ابقى جِد
العيال.
- ف ضهرك كلام زي السكاكين .. وف وشك أولياء
الله الصالحين.
- إوعي تعمل الغلط وتقول مضطر .. هو ينفع تلبس
شتوي وتقول الدنيا حر!؟
- اللي انت بتحلم تعمله أنا باحاول أبطله.
- السواقة فَن مش عَن عَن.
- لو قلبك مات ماتجيش على اتنين اخوات.
- ده قال وده عاد وده زاد .. بس الفِعل دايماً
للأسياد.
- مش محتاج اتكلّم عن نفسي .. الناس كلها
بتحلف باسمي.
- لو ما فيش حَد بيغلط ما كانوش حطّوا فوق القلم
أستيكة.
- إسأل عني ح يقولوا لك حاجتين : معروف
بالاحترام .. وما لوش في الحرام.
- أنا يوم ما ابيع .. مفيش ترجيع.
- أنا لمّا باقفل مع حَد باضيّع المفتاح.