صورة واحد دكتور عيّان (7)
- طبعاً .. ده اللي ما بيشربش سجاير ده يبقى مُخنّث ومش مُكتمِل الرجولة أصلاً.
- بَس السجاير مُضرّة بالصحّة!
- مين قال الكلام الفارغ ده؟! .. أنا كُنت مرّة في "السويد" واشتريت سجاير روسي لقيت مكتوب عليها بالألماني: "تشيخين آخين فاخين داخ سباخ سياخ بَخ شَخ" .. يعني بالعربي: "التدخين مُمتِع ومُفيد للصحّة جداً قوي خالص".
- طب حضرتك ليه سمّيت نظامك "الحَسَنات"؟
- أنا حُر .. حَد شريكي؟! .. وعموماً علشان أرضي فضولِك .. أنا سمّيته كده علشان اللي بيمشي عليه بيكسب حَسَنات كتير وبتتشال منه السيّئات اللي عملها ف دُنيته لإنه آمن بيَّ وربّنا قال في كتابه الكريم.....
وأخذتُ أهبد وأُهرتل في الكلام فأذكر آيات قُرآنيّة وأحاديث نبويّة وأُفسِّرها كما يحلو لي وأنا أعلمُ جيّداً أنني لن أُحاسَب على أي كلام طالما كان بعيداً عن السياسة والنظام، ولم أنسَ بالطبع أن أذكُر بعض الكلمات والمُصطلحات باللُّغة الإنجليزيّة لأنني شخصٌ مُثقَّفٌ فصيحٌ مُتعدِّدُ الألسُن.
وفجأة سألتني الإعلاميّة:
- بَس انا يا دكتور مُعترضة على كلامك عن المرأة.
- أنا حُر .. ده رأيي .. أنا اتجوّزت فوق الاتناشر مرّة وعندي خِبرة كبيرة ف السِتّات .. المرأة كائن ربّنا خلقها من أجل مُتعة وراحة الرجُل فقط .. والراجِل مسؤول عن تأديب مراته بالشكل اللي هوَّ شايفه .. يضربها بالقلم .. بالشلّوت .. بالقفا .. بمنفضة السجاجيد .. بالجزمة .. بأي حاجة تطولها إيده .. وده كمان اتعلّمته ف طفولتي من جدّي الله يرحمه ويبَشبِش الطوبة اللي تحت قفاه كان بتاع نِسوان بَس عمره ما خان .. الراجِل عُمره ما يخون السِت .. السِت بَس اللي بتخون.
- يا دكتور رِفقاً بالقوارير.
- وهيَّ السِت اللي عندنا دي قارورة!!! .. دي قُلّة يا ماما .. دي تِستاهل الضرب بأوْسخ جزمة .. دي أبوها حرامي أصلاً .. ههههههه
- باين عليك شايل م الستّات قوي.
- بُصّي يا مدام: أنا جرّبت ودوِّبت جميع أنواع السِتّات .. الرُفيّعة والتخينة .. الطويلة والقُصيّرة .. المدملكة والمأزعرة .. ما استريّحتش مع واحدة فيهم .. استريّحت ساعات لمّا كُنت باتجوّز تلاتة مع بعض .. أصلي باحب اتدلّع قوي.
- طب نرجع لنظام "الحَسَنات" .. ده عبارة عن إيه؟
وشرحتُ بالتفصيل هذا النظام الرائع فقُمتُ بذِكر أنواع الطعام المسموح به ولم أنسَ أن أروِّج لبعض الأصناف التي طلبت مني شركة الدعاية الإعلان عنها نظير أجرٍ معلوم .. ومنعت نصف نِعَم الله من الطعام الذي حلّله لعِباده لتكون لي شخصيّتي المتفرِّدة المُستقِلّة.
ولكن المُذيعة الموْتورة قاطعتني قبل أن أُحرِّم على الناس المزيد وسألتني:
- بس إيه سبب وفاة بعض الحالات التي حضرتك قُمت بعلاجها؟
- وانا مالي .. هُمَّ اللي سمعوا كلامي واقتنعوا بيَّ ومشوا على نظامي .. يتحمّلوا بقى .. وبعدين إنتم ف البرنامج هنا حفيتوا علشان اطلع معاكم ليه؟ .. علشان أنا ظاهرة غيّرت مفاهيم الطب والمرض والعلاج وقلبتها رأساً على عقب .. العالم كُلّه بيتكلِّم عني يا ماما .. خلاص .. إبقوا ادرسوني بعدين بقى براحتكم.
السبت:
استدعتني وزارة الصحة والنقابة للتحقيق معي فيما أقول وأُمارس .. كلّهم ولاد كلب متغاظين مني .. روحت التحقيق وادّيت المُحقِّقين بالجزمة علشان يعرفوا مقامهم كويّس .. بَس وقّفوني عن العمل وسحبوا مني ترخيص مُزاولة المِهنة ... طُظ .. ولا يهمّني .. دول كده بيخدموني وخلّوا الناس يصدّقوا إن المُغرضين دول بيكرهوني علشان أثّرت على مصالحهم القذرة والناس اتعاطفِت معايَّ أكتر وصدّقِتني أكتر واكتر.الأربعاء:
فكّرت في مُستقبلي بالليل لقيت إني لازم أعمل زي كل الأنبياء اللي سبقوني واهاجِر برّه القرية الظالم أهلها .. بس انا ح ابقى أنصح م الأنبيا دول .. مش ح اهاجر للصحرا .. لأ .. ح اهاجر لدوْلة خليجيّة أحسن من "أوروبا" كمان .. صحيح ما معاييش ده الوقت أبو بكر ولا أنصار ولا حواريين بَس بُكرة ح ألِم أتباع ومُريدين بالملايين .. وح اترستَق واخُد وضعي من جديد خصوصاً إني متّفِق مع ناس أغنيا هناك وح نعمل مجموعة شركات ننتِج فيها الأغذية المسموح بها في نظام "الحسَنات" .. Hasanat Company .. وح اكسب دَهَب .. واللهِ لاخلّي اللي كفروا بيَّ يندموا أشد الندم.
الثُلاثاء:
......... لم أستكمل باقي هذه المُذكّرات نظراً لظرفٍ طارئ .. ولكنني سأعود أقوى .. فأنا فكرة .. والفِكرة لا تموت.