صورة واحد دكتور عيّان (6)
الجمعة:
أنا الآن في برنامج مُذيعة إعلاميّة أجهل اسمها وقد بدأتْ في مُحاورتي وأنا أعيش الدور وأتكلّم من أنفي بمنتهى الغرور والتناكة وأنا أضع رِجلاً على رِجل لأؤكِّد أنني طبيبٌ عظيم ما جابتنيش ولّادة، وبادرتْ المُذيعةُ بقوْلها:
- بعد ما شاهدنا تقرير البرنامج عن دكتورنا العظيم الفّذ "نور عوض" وآراء العشرات من المرضى اللي خَفّوا على إيدُه بنرحّب به معنا .. أهلاً وسهلاً يا دكتور .. نوّرتنا وشرّفتِنا وكبّرتنا يا دكتور يا عظيم .. أنا مش مصدّقة نفسي إني قاعدة مع معاليك.
- أهلاً.
- إحمممم .. أوّلاً إيه نظريّة حضرتك في علاج المرضى؟
- نظريّتي بتتلخّص في إن المعدة هي بيت الداء ولو الناس بطّلت كل أنواع العلاج بالأدوية ومشيت على منهجي ح يخِفّوا من جميع الأمراض وعُمرُهم ما ح يعيوا تاني .. وأبحاثي بتُدرَّس الآن في الجامعات العالميّة زي "أوكسفورد" و"كليفلاند" و"بيج نوز" و"جريت آس" وفي معاهد "السوربون" و"فيرا" و"الأورمان" و"اللاسلكي".
- يعني حضرتك عملت أبحاث وتجارب بقى.
- أومّال.
- ودي اتنشرت طريقتها ونتايجها فين؟
- ف كُل العالم يا ماما؟ .. خصوصاً تجرُبة القُمع البُرتُقاني والقُماشة الموهير الجانجا وأطباق البولات الهضميّة اللي كانت أوّل مرّة تتعمل قُدّام العالم كله ع اليوتيوب.
- ويا ترى كان رد الجهات البحثيّة عليها إيه؟
- ما يهمّنيش أعرف رأيهم لإني مش مستنّي حُكم الناس اللي أقل من مستوايَّ العلمي والطبّي على شُغلي.
- بَس فيه ناس مش فاهمين أبحاث حضرتك قائمة على إيه!
- ومش ح يفهموا .. أنا باوجِّه كلامي للعباقرة فقط اللي يقدروا يفهموا كلامي .. وبعدين الكلام النظري مش أهم حاجة عندي .. لأ .. المُهم اللي حاصل على أرض الواقع .. أنا جرّبت طريقتي ع المرضى عندي والنتيجة الواضحة إنه خَفّوا .. نُقطة .. بَس خلاص .. ما فيش داعي بقى للهري الكتير .. هاتي لي أي واحد يناظرني ح اسُكُّه على قفاه ومش ح يقدر يفتح بُقُّه ولا يقول لي تِلت التلاتة كام.
- طب انا معايَّ مُداخلة من دكتور "فهيم" أستاذ ورئيس قسم الباطنة بإحدى الجامعات.
- ما انا قُلت مش عايز مُداخلات وقَرَف بقى.
- إممممم .. آآآآ .. اتفضّل يا دكتور "فهيم".
- أنا بارحّب بحضرتِك وبالدكتور "نور" .. بَس انا بصراحة باسمع منه كلام غريب وخطير .. لإن البحث العلمي له قواعد إسترشاديّة لازم الكُل يمشي عليها وكمان المفروض إن الـ....
- باشااااااع .. أنا مش مُعترف بالقواعد دي يا دكتور ومُنشَق عليها.
- إزّاي بقى! .. أومّال انتَ ماشي على إيه؟
- ماشي على كيفي .. ع القواعد بتاعتي أنا بَس .. أنا حُر .. أنا مش عبد زايّكم لمُنظمة الصحة العالمية وهيئة الدواء الأمريكية والكلام الفارغ ده .. ده شُغل بيزنيس وتجارة بالمرض والمرضى .. حرام عليكم بقى ارحموا الناس.
- لأ .. أنا ما اسمح لكش تقول لي كده أنا أستاذ ورئيس قسـ....
- على نَفسَك يا اخويَّ .. أنا كل المرضى بتخِف عندي .. شوف انتَ كام واحد مات ف عيادتك .. ده انتَ عندك القوْلون أصلاً وكِرشك مدلدِل وكله انتفاخ وغازات وزِفت من كُتر الطَفح اللي بتطفحه .. روح يا عَم عالِج نفسك الأوِّل بلاش قَرَف.
- آلو .. آلو .. يا دكتور "فهيم" .. آلو .. الظاهر قفَل السِكّة.
- شوفتي بقى .. أهم كلّهم كده .. ما يقدروش يناظروني علشان بافحِمهم .. أنا مُستعِد أدّي مليون جنيه للي يناظرني .. هل من مُبارِز قصدي مُناظِر؟ .. كلّهم بيكرهوني وعايزين يدمّروني علشان كشفت ألاعيبهم وعايز أنقذ ملايين المرضى من تجارتهم .. أوْباش خوَنة .. ولعلمِك أنا لو حصل لي حاجة تعرفوا إني ما انتحرتش ولا مُت موتة طبيعيّة .. لازم ساعتها تكونوا عارفين إن الناس دول هُمَّ اللي قتلوني.
وعدّلتُ من جلستي وأشعلتُ سيجاراً فباغتتني المُذيعة:
- هوَّ حضرتك بتشرب سجاير؟