كُلّه جايز ..حتى خَلَف العجايز
وضع خرطوم النرجيلة جانباً ثم نظرَ إلى ابنه مُتمنياً موافقته قائلاً:
- أنا نويت اتجوّز البِت "نادية"
أُخت "جابر" السبّاك.
- معقول يا با؟!! .. ده انت أرمل قرّبت
ع السّتين وهيَّ متطلّقة عندها حوالي عشرين بَس.
- وما له يا وَله؟! .. مش ينفع أخلِّف
منها؟
- مش مضمون .. فرق السِن كبير.
- بس انا اعرف رجّاله كتير ف الحارة خلِّفوا
وهُمَّ عندهم ستّين وسبعين.
- يا سلام!!!
- أومّال ايه .. وتمانين وتِسعين سنة
كمان وحياتك.
- ها ها ها .. لأ .. دي وسعِت منك يا
حاج.
- ليه بقى؟ .. هوَّ اللي وصل للسن دي ما
ينفعش يخلِّف؟!
- لأ .. ينفع طبعاً .. بَس ف حالة واحدة: يكون عنده جار شاب.