في إطار الحملة القوْمية لتكميم الأفواه المصريّة (لضمان عدم فتحها إلّا في عمليّتيْ الأكل والقيء فقط) تم عقاب عامل بالسكّة الحضيض .. ورئيس هيئة السكك الحديدية بنفسه هوَّ اللي خصم شهر كامل من فني صيانة بسيط علشان انتقد (وليس شتم أو سب) مديره المحاسب بالشؤون المالية على صفحته الخاصّة بالفيسبووك .. وقاموا جريوا ع الصحافة لنشر الخبر للتدليل على مدى دقة العمل وصرامة مراقبة العاملين بالهيئة حتى على مواقع التواصل (ويمكن في حجرات النوم ودورات المياه كمان) .. يعني سايبين مهازل التسيّب والانحلال وسوء الخدمة وعدم انتظام مواعيد القطارات وحوادثها المتكررة وخسائرها المالية ورايحين يتباهوا بالتنطيط على عامل غلبان ح يشتغل شهر كامل بدون مرتب يصرف بيه على أسرته في شهر دخول المدارس رغم إن مرتبه أصلاً (كباقي المصريين العاديين) مش بيكفيه وأكيد بيستلف فوقه .. إيش حال بقى ما فيش مرتب خالص .. بس بيني وبينكم هذا العامل الخرسيس النرسيس الأدب سيس يستاهل اللي جرى له علشان يحرّم ينتقد أسياده .. خصم شهر واحد شويّة عليه الكلب ده .. المفروض كانوا خصموا منه سنتين تلاتة.