أنا الفَقير يا رب
يا رَب .. أنا الفَقير
أنا الفَقير يا رَب
يا حَيْ يا قَيّوم
يا رَب .. إنت الرَحيم
والعَدْل فيك مَعْلوم
يا رَب .. يا اللي خَلَقتني
دون العباد مَعْدوم
ومِن النَعيم مَمْنوع
ومِن المُتَع مَحْروم
وف الديون غَرْقان
وف المَجاري باعوم
مَكتوب عَليَّ السَهَر
وعينيَّ ما تشوف نوم
عين ف وسط الليالي
أسْهَر أعِد النجوم
أنا اللي عَمَلوا لي دَعْم
وانا اللي مِش مَدْعوم
ده انا بَنْطَلوني مرَقّع
ومِن وَرا مَشْروم
وحَتّى جيبُه الكبير
مِن الفَلَس مَخْروم
أنا بِعْت عَفْش البيت
وحتى بِعْت الهُدوم
وازّاي ينام بَردان
إزّاي ينام مَديون
ولّا ينام مَغْبون
ولّا ينام مَهْموم
وكأنّي عايش حَياتي
بملابِس الإحرام
وكأن مُتَع الحياة
عَلى اللي زَيْي حَرام
اللَحْمَة ما
باشوفهاش
إلّا ومِتعَلّقة
وجِسْمَها مختوم
والفاكهة لا اعرَف
طَعْمَها
ولا حَتّى فاكِر
اسمها
كُل اللي فاكرُه الدوم
ويا ريتُه حَتّى
يدوم
ولأنّي مِش لاقي
أدفَع إيجار البيت
بانام عَلى الرَصيف
زَي الكلاب ما تنام
أنا اللي كَلْت
الزبالة
والأكل فيها سموم
وإن مَرَّة ما لَقيت
أكل
باقول نَويت الصوم
وآديني باكُل يوم
واصوم ف تاني يوم
بافرَح كتير جِداً
لَمّا الآدان يدَّن
وآهي فُرْصَة
أتوَضّا
واغسِل آلام وهموم
أصْلي نسيت الصابون
وكمان نسيت الحموم
وعَشان باحِبِّك يا
بَلَدي
مَهْما أكون مَظلوم
بيحطّوني ف وِش
المَدْفَع
لَوْ يوم جا عَلى "مَصر"
هجوم
يا رب .. أشكي لمين
غيرَك ما ليَّ حَد
صابِر على غُلبي
مَهْما الزَمَن يشْتَد
حَتّى اللي ظالِمني
إن رُحت لُه أشكي
عَليَّ ليه يحْتّد؟
أنا اللي عايش حَياتي
ما لهوش ولا لازمة
وإن رُحت يوم القِسْم
(قِسْم الشُرْطة)
يدّوني بالجَزْمة
وإن يوم طالِبت
بحقوقي
يقولوا لي: "ده
اسمه
تَهديد لأمن البَلَد"
ويعملوا أَزْمة
ده انا حَتّى خايف
يسمَعوني
يفتِكْروا إنّي
باشْتِكي
مع إن الفُقَرا
ساكتة ومُلْتَزِمة
أنا بَس اللي غايظني
إن حُكّامنا
بيتاجروا بأحوالي
وبيوْعِدوا بفدادين
وبيوْعِدوا بشَقّة
ويحَسِّنوا حالي
وبيوْعِدوا بمَعاش
ويزَوّدوا مالي
مَعَ إنّهُم
كَدّابين
يا رَب .. أنا راضي
وإيماني راسمالي
بّسْ المُهِم إنّي
لا بِعْت يوم نَفسي
ولا بِعْت يوم
وَطَني
ولا بِعْت ف ضَميري
وكُل أمَلي يارب
يبقى عَندي سرير
واموت عَلى سريري
ويقولوا: "كَلْب
ومات"
ومَكاني فوق السرير
ياخدُه فَقير غيري