خبر
أخبار ملهلبة

نوارة | أحمد فؤاد نجم

الصفحة الرئيسية

 


نوّارة

 

 

"نوّارة" بنتي النهار دَه تِبقى
بتخَطّي عَتَبة ليوم جِديد
يا رَب خَلّي
يا رَب حافِظ
يا رب بارِك
يا رَب زيد

يا رَب كَبَّر
"نوّارة" تِكْبَر
وتِبقى أكبَر
في كُل عيد
لأ .. كُل جُمْعَة
لأ .. كُل يوم
لأ .. كُل ساعة
لأ .. كُل لَحْظة
تنول وتِحْظى
وتزيد نَباهة
وتزيد مُلاحظة
وتِحظي "مَصْر" السَعيدة بيهُم
ويبقوا ليها
وتِبقي ليهُم
غيطانها جَنّة
وترابها حِنّة
والنِسْمة خَمْرة
ف قزازة حَمْرا

والنيل نَجاشي
ما فيش "ما جاشي"
تَمَلّي ييجي
أخْضَر مليجي
دايْما يوَفّي
دايْماً يكَفّي 

كُل الخَلايق
يصبَح صَباحُه
فَلّاحُه يمشي عَلي شَطُّه عايق
ما فيش معاكسة
ما فيش مضايق
ما فيش عَساكِر وقَهْر تاني
كُل الأماني بَقِت حَقايق
يا رَب وَفّق
يا رَب وافِق
يا رَب ريد
واكتِب عَليهُم
ف كُل لَحظة فَرَح وعيد

-       "بَسْكوتة بابا"

-       "حاضِر يا ماما"

وتقوم تدوسني
عَشان تبوسني
وتنام ف حُضني
وتقوم ف حُضني
وتعمِل العَمْلة
تملا حُضني

-       لله يجازي البعيد شيطانِك
 حُمارة كَلبة
 مِش عيب يا ماما
 كِدَه البيجامة؟!
 مِش بابا قايل
 وماما قالِت
 مِن طول ما حَطِّت
 وطول ما شالِت
 ساعِة ما تِبقي الحِكاية كُـخَّة
 يقولوا {إإح قَوام ياماما}"

-       "بَسْكوتة بابا"

-       "بَسكوت ف عينِك

ما فيش مُعاملة بيني وما بينِك
 يللا امشي قومي
 حُمارة كَلبة باظِت هُدومي"

ما تقومش طَبَعاً ولا أيْ حاجة
وكأنّه مَثَلاً ما حَصَلْش حاجة
تقعُد تكَلْضَم وتِلوي بوزها
وتِتجاهِلني كأنّي جوزها

-       "خاصماك يا بابا

ما تكلّمنيش"

-       "طُظْ ف عَظَمْتِك
 ما يهمّنيش
 دِيّتها بوسة أو تَهْشيكاية
أو بسكوتاية

 أو بونبوناية
 ح تسوقي شُغْل النَدالة طَبَعاً
 وتروحي جارّة الكَلام معايا
 و{بوسة بابا}
 أديكي بوسة
 {سُكّر يا بابا}
 تِدّيني بوسة
 {كِده اصْطَلَحْنا خَلاص يا بابتي}
 كِده اصْطَلَحْنا يا نوّاراية
 مِش دي الحكاية؟!
 ولّا انتي يَعني
 لأ يعني إيه .. ما تخَرّفيش
 دي تِبقي يَعني الحِكاية يَعني
 مَلعون أبوكي .. ما تآخذينيش
 لَوْ كان ف قَصْدِك
 أوْ رُبع قَصْدِك
 أوْ كُنتي حَتّي ما تُقْصُديش
 إن انتي يَعني {خاصماك يا بابا}
 ح تِخْصِميني أطْلَع ما فيش"

 

أبوكي يَعني ماكانش حاجة
لكنّه حاوِل يعيش لحاجة
وجيل أبوكي كان يَعني حاجة
وجيلِك انتي ح يبقى حاجة
و"مصر" تِبقى النهار دَه حاجة
وبُكْرة حَتْما ح تِبقي حاجة
وأيْ حاجة ما تكونش حاجة
إلّا وسَبَبْها ف الأصْل حاجة
وبُكْرة لَـمّـا قمركوا يطلَع
والشَمْس تسطَع فوق كُل حاجة
ح تقولوا كان ف المكان دَه ناس
فيهُم طَيابة .. فيهُم حَماس
وف الحَماس بَعْض شي عَباطة
وكانوا آخِر الأمْر ناس
وكان زَمانهُم سُجون وكانوا
ما بين سجونُه وأمريكانُه
وبين ضَباب الطَريق حَياري
ما حَد قادِر يشوف مَكانُه
ح تقولوا كانوا .. وياما كانوا
وياما شِرْبوا .. وياما عانوا
وياما جا لهُم
وياما جيلهُم
دَفَع وكان الثَمَن أمانُه
وياما ناس ف المَسيرة مشيوا
وناس ف نُص المَسيرة خانوا
ح تقولوا كانوا
أو ياما كانوا
لكن ح يبقى ف الأمْر حاجة
إن اللي عَرْبِد ما سابش حاجة
وساب كلابُه عَلي كُل حاجة
تِهْبِش وتِنْهَش ف كُل حاجة
ما قدِرْش يقتِل ف أيْ حاجة
روح التَفاؤل بكُل حاجة
 

 

أحمد فؤاد نجم

google-playkhamsatmostaqltradent