من أوراق معرعر
اشتريني يا با من ساسي لراسي
آآآه .. وفوق البيعة خُد أهلي وناسي
ده انتَ لوْ جرَّبت تِلبِسني ف رِجلَك
راح تقول م الانشكاح: "يسلَم مَداسي"
أصل مَحسوبَك عجينة ف كُل إيد
أصل انا اتربّبيت - زَمان - تحت الكراسي
إبن جِنيّة وشِركة حَليطة
واعرَف اتحكِّم ف لوني وف مَقاسي
واعرَف اطبُخ يَخني لاصحاب المَصالِح
للمقاوِل والمُحامي والسياسي
لوْ عايزني أبقى فاكِر ح ابقى فاكِر
لوْ عايزني أبقى ناسي ح ابقى ناسي
لو عايزني أبقى راجِل تَحت أمرَك
غير كده ماشي .. ح اقول لَك: "آه يا قاسي"
قول: "فَرَح" .. تِلقاني أرقُص بالصاجات
قول: "عَزا" .. تِلقاني أتشَحتِف واواسي
والطاقيّة البِسها وحياتَك ف رِجلي
أيوة .. وبدال الطاقيّة البِس لِباسي
وابقى راجِل والبِس اللِبس البَناتي
والحَس الجَزمة واقول: "أطعَم جيلاتي"
واتنِقِط مِنك ولكن أحضُنَك
وابقى مش طايقَك واقول لَك: "يا حياتي"
إشتريني وخُدني لاصحابَك هديّة
إشتريني واعمِل اللي تحِبُّه فيَّ
إشتريني واتقلِب لَك كومودينو
واتقِلِب جزّامة واصبَح بطّانيّة
نوركوا يقطَع .. جِسمي يتحوِّل برايز
وانتَ حُط الفيشة مَطرَح ما انتَ عايز
بَس شوفني بأي حاجة ف الحياة
لوْ وِزارة ولّا جُرنال أو قَناة
أي شيء مُمكِن يعلّيني على الناس كُلّها
نِفسي اشوف الناس بتحتاجني .. وعايز ذُلَّها
نِفسي اخُش ف زُمرِة الناس اللُذاذ
ما تجيبوش سيرة الوَطَن .. يوْلَع بجاز
الوَطَن مش جار تروح تسأل عليه
الوَطَن مُزّة ومَزّة معاها ويسكي
الوَطَن - يا مُحترم - فيلّا وشاليه
الوَطن شُهرة وأموال ف البنوك
والقُعاد ع الكرسي جار أسياد أبوك
تبتِسِم .. فالناس تفسَّر ف ابتِسامتَك
وبذكاء تِكذِب ع اللي يكَذِّبوك
شُغلتي ودايماً باحِن إني اشتَغَلها
زَيْ ما تحِن المَراكِب للمراسي
إشتريني يا با من ساسي لراسي
آآآه .. وفوق البيعة خُد أهلي وناسي