لا حول ولا قوّة إلّا بالله .. قرش من نوع "الجيتار" (ويُطلَق عليه في الخارج: الفك المفترس أو القرش الجبّار أو ملك البحار) غلط غلطة عمره ودخل المياه الإقليمية المصريّة يا كبد امّه .. المصريين مسكوه ودبحوه ولفّوا بيه يزفّوه في محافظة جنوب سينا كلها ومسحوا بكرامة أهله الأرض وبعدين قطّعوه حتت وباعوه ف السوق زي أي بسارياية هَفأ .. وآخرة المتمّة كمان يسمّوه "بهلول"!! .. على فكرة كلمة "بهلول" في اللغة تعني المعتوه أو الأحمق أو المجنون أو المجذوب .. يعني الراجل كان له احترامه ومكانته وهيبته الكبيرة وكانت أي سمكة صايعة ف البحر تشوفه تقف له على ديلها أو تستخبّى منه وتعمل له ألف حساب ولمّا دخل مصر بقى قرش مهزأ وملطشة وعرّة القروش وكمان "بهلول" .. منتهى البهدلة وقِلّة القيمة .. إخص .. يا ناس ارحموا قرش قومٍ ذل .. يعني هيَّ دي آخرة اللي ييجي مصر بزعانفه .. بس العيب عليه الغبي ده: ده أكيد مش قرش من النوع "الجيتار" ولا "جبّار" ولا "سيد البحار" .. ده ميّة الميّة من النوع "الحمار".