يا مصري ليه دنياك لخابيط
يا مصري ليه دنياك لخابيط
والغُلب مُحيط
والعنكبوت عشّش ع الحيط
وسرح ع الغيط
يا مصري قوم هِش الوطاويط
كفاياك تبليط
صعبة الحياة والحل بسيط
حبّة تخطيط
فتحت باب استيرادك
وصرفت فوق ضِعف إيرادك
حِلي للخواجة استكرادك
سابك بتقرا ف أورادك
ودا أشّطك ونِزل تشفيط
ومهولاتي تحب تزيط
ساعة الفرح زغاريط تنطيط
وف المياتم هات يا صويت
وف المظاهرات سُخْن تشيط
وف الانتخاب تنسى التصويت
وليه بترشي وتتساهل
وتضيع حقوقك بالساهل
تستاهل النار تستاهل
يا غويط ويحسبك الجاهل
ساهل وساهي وغبي وعبيط
يا مصري ياللي الغلا عاصرك
والنهب في عصرك حاصدك
قوم للحياة واسبق عصرك
ولا حاجة ح ترجّع مصرك
إلّا ان تكون شغّال ونشيط
يا مصري ليه دنياك لخابيط
والغُلب محيط
والعنكبوت عشش ع الحيط
وسرح ع الغيط
يا مصري قوم هِش الوطاويط
كفاياك تبليط
صعبة الحياة والحل بسيط
حبّة تخطيط