بيان هام (هنا شقلبان)
هنا شقلبان
محطة إذاعة حلاوة زمان
من "القاهرة" ومن "كُردفان"
وسائر بلاد العرب و"اليابان"
ومن "فنزويلا" وأيضاً "إيران"
ومن أي دار
أو بلد مستباحة
بفعل السياحة مع الأمريكان
هنا شقلبان
محطة إذاعة حلاوة زمان
نقدِّم إليكم بكل اللغات
مراسح وسيما وجميع الفنون
صحافة ومنابر وتلفزيونات
وخُطُبا ف جوامع وجبنة وزتون
ونقزح ونركب جميع الموجات
ونبحث ونفهم ف كل الشؤون
ودايماً نلعلع ف كل الحالات
ولا حَد سامع ولا يحزنون
وتسمع ما تسمع .. ده ما يهمناش
لأن احنا أصلاً بناكل بلاش
فخلّيك ف نَفسَك وما تخلّيناش
نسلّط عليك القلم واللسان
هنا شقلبان
محطة إذاعة حلاوة زمان
يسر الإذاعة ولا يسُرّكوش
بهذي المناسبة ولا بندعيكوش
نقدم اليكم شحاته المعسل
وبدون رتوش
شبندر سماسرة بلاد العَمَار
معمّر جراسن للعب القُمَار
وخارب مزارع و تاجر خُضار
وعقبال أملتك أمير الجيوش
ما تقدرش تنكر
تقول ما اعرفوش
ما تقدرش أيضاً تقول ما اسمعوش
شحاته المعسل حبيب القلوب
يزيل البقع والهموم والكروب
يأْنفِس يأْفِين يبلبع حبوب
ويفضل يهلفط ولا تفهموش
وتفهم ما تفهم دا ما يهمناش
لأن انت فاهم وعامل طناش
ح تنكِر وتحلِف ح اقول لك بلاش
ح تتعِب دماغنا وتتعَب كمان
هنا شقلبان
محطة إذاعة حلاوة زمان
لإن المخبي ظَهَر واستبان
وكل المسائل بَدِت للعَيَان
وطلعِت حكاوي ونزلت كمان
عن التهريبيّة وعن كيت وكان
وعن محسوبيّة وعن أُلعوبان
ظهر ف المدينة كأنه الطوفان
وغرّق مراكب وسوّح غيطان
وبعض المراكب ح تغرق كمان
وأزمة مساكن وأزمة أمان
وعالم بياكل ف عالم جعان
وريحة مؤامرة ف جَوْ المكان
مُخطَط خيانة مع الأمريكان
لدبح العشيرة وحَرْق الجيران
وفيه ناس بترغي ولازم بيان
كما ابلغونا جميع الوِدان
لهذا وذاكا وتلكُم كمان
نقدم إليكم عروسة وحصان
شحاته المعسل وهذا البيان:
بسم الله
سلامٌ عليكم وسَلَمون وموز
وأمّا المسائل فهَنْجَف ولوز
فيا إخوتي ويا أخوات
إليكم بياني كما هو آت
جميع المسائل تمام التمام
وكل الكلام دا مجرّد كلام
فصبراً جميلاً ولا تقلقوش
وشُغْل الضغاين أنا ما اقبلوش
ما فيش أي حاجة
عليَّ الطلاق والعتاق بالتلاتة
ما فيه أي حاجة
وقدَّر كمان إن فيه أي حاجة
ما فيش أي حاجة
ما لوش أي لازمة الكلام واللَجاجة
وعيب إن عيّل يسوق السَماجة
ويعمل لي باللو ويعمل ديباجة
أنا بطبعي ضد السماسرة الكبار
بحُكْم المنافسة وحُكْم الجِوار
لكن مش ف طبعي
إنى أعمل فضيحة
لواحد زميلي هَبَش كام صفيحة
لا دا من قِيَمنا
ولا من شِيَمنا
ولا دا لُغانا
ولا دا كلامنا
ما كُل الزمايل بتهبِش صفايح
وكل اللى جاي ماشي زي اللي رايح
فيا أيها الشعب صَهْين تفَلْعَص
مساء التنفّس .. مساء الروايح
أخويا الأمير بزرميط الإيرانى
بَعَت لي السنة دي
عزمني ودعاني
وانا قبلت فوراً
ورُحنا العزومة
وكانت وليمة ما تحصلش تاني
ده إيه المحمّر
وإيه المكمّر
وإيه المشمّر
وإيه الصواني
وانا دماغي تعبِت ولَفِّت صراحة
من الفخفخة والهَنا الأصفهاني
هناك يعني مثلاً إذا شرِبت طافية
تمِز بكوارع وبسطرمة ضاني
ما شُفتِش هناك ناس بتحقِد عليهم
ولا ناس بتشتِم فلان الفُلاني
لإنه اشترى عِزبتين من شطارته
وحِكْمِة إدارته
وطلّع مباني
وبعد الوليمة استلمنا الهدايا
مفضض ومُدْهَب وقَز وقيشاني
وطبعاً أخويا الأمير قال لي حاجة
ح اقولها لكو طبعاً إذا الوقت ناسِب
ح يطلع لي عيّل بدون أي حاجة
ويعمل لي فَلْحَس ويُقعد يحاسب
دا حقد اشتراكي أنا ما اقبلوش
ولو هوَّ إبني أنا ما اعتقوش
كلام عن سماسرة وكلام عن دعارة
حاجات مش صحيحة وجُمَل مُستعارة
عايزين يخلّوا البلد أرْدَغانة
وعايزنّي اسيب البلد من زمان
وانا مش ح اسلِّم واسيب الأمانة
ولا بالبوليس والنيابة كمان
فيا أيُّها الشعب كمِّل جِميلك
وصبراً وألزِم ح تيجي المَصاري
وتاكل وتشرب تبع ما يآتي لَك
وتغرق فى بحر العبيد والجواري
وترسِم حياتَك حسب ما يرائي لَك
وتِملا الحواري فَسَاقي وقَصَاري
تسبّح بحمدك وتشكر جِميلك
وفَضْل الزبالة وطَفْح المجاري
ختاماً سلاماً وآخر كلاماً
ضروراً يسود الهدوء والوئاماً
فماذا وإلّا ح اطربقها والله
واهرّب فلوسي واسافر قواماً
سلامٌ عليكم وسَلَمون وموز
بصفتي رئيساً وأبّاً وجوز