حكم بلدي عن قِلّة الأصل
خسارة قليل الأصل مكسب.
قِلّة الأصل بَقِت منهَج .. وانا عرَفت ناس ما شاء الله دحّيحة.
الأصول ما حَدِّش بيتعلِّمها .. يا تتربّى عليها .. يا تعيش عُمرَك كله تسمع بيها.
قليل الأصل نبي ف نفسُه .. إبليس مع الناس.
قليل الأصل لا تعاتبه ولا تلومه .. ده زي البُقعة اللي ما تطلع برابسو ولا بأومو.
ابن الأُصول لو أكِّلتُه عيش حاف بيصون .. وقليل الأصل لو أكِّلته لَحم كتافَك بيخون.
قليل الأصل انساه .. ح يفضل واطي لو الزَمَن علّاه.
ابن الأصول يؤتمَن حتى ف عداوته .. وقليل الأصل لا يؤتمَن حتى ف صداقته.
لو البصل بقى مربّى .. يبقى قليل الأصل يتربّى.
آه يا زَمَن .. فيك القلوب بَقِت سودا .. وقِلّة الأصل بَقِت موضة.
عُمر الجَدَع ما يقِل بأصلُه .. وعُمر قليل الأصل ما يعرف يكون جَدَع.
قليل الأصل لا تاخدُه صاحب ولا حبيب .. تِلقاه من وَراك بيعيب .. دي قِلّة الإصل مرض لا ليها دوا ولا طبيب.
الميّت عُمره ما يقوم .. وصاحب المصلحة مُستحيل يدوم .. وقليل الأصل ما عليه لوم.
يا بخت قليل الأصل اللي ما عندُه دَم .. لا بيحس بالناس ولا بيشيل هَم.
لو قليل الأصل اتعشِّم فيك بزيادة .. ح يعمِل من قفاك سِجّادة.
السَبع يفضَل سَبع ولوْ مال الزَمَن بيه .. والوَرد مهما دِبِل يفضل عَبيرُه فيه .. لكن قليل الأصل مهما الزَمَن يدّيه .. لا يوم يحِس بشَبَع ولا يشكُر اللي عاطيه.
قليل الأصل متغندَر وعامِل بيه .. عايش ف الدور ومتصوَّر ح نجري عليه .. وقِلّة أصله دي وراثة .. حياتُه غِل وغَلاسة .. راضعهم جوَّه بَزّازة .. يا ريتها بَرَكِت يومها عليه.