معاي عربي .. بابيع عربي
مَعَاي عَرَبِي.. بَابِيع عَرَبِي
مَعَاي عَرَبِي بِيَكْتِبْ شِعْر
بَابِيعْ عَرَبِي بِأَرْخَص سِعْر!
مَعَاي عَرَبِي.. بَابِيع عَرَبِي
مَعَاي عَرَبِي يَبِيع أَرْضُهْ
بابيع عربي يسيب حَقُّه
مَعَاي عَرَبِي مَا لُوشْ نَخْوَة
وَلا بِيْغِير عَلَى عَرْضُه!
تاخُد عَرَبي؟ .. تاخُد عَرَبي؟
مَعاي عربي يعيش عَبدَك
خُد العَرَبِي يكُون بَخْتَك!
مَعَاي عَرَبِي يَاكُل بِالدّين
خُد العَرَبي ومراتُه الحين (الآن)
خُد العَرَبِي وَحَرِيمُهْ كَادُوهْ (هديّة)
مَعَاي عَرَبِي يَبِيع اللِّي جَابُوهْ
مَعَاي عَرَبِي يِلَاقِي أَخُوه
.. قَتِيلْ، وَيقُول: "أَنَا مَالِي؟!"
مَعَاي عَرَبِي مَا لُوش غَالِي!
مَعَاي عَرَبِي وَفَاضِل لُه لجامْ
مَعَاي عَرَبِي وَآخْرُه كَلَام
مَعَاي عَرَبِي فِي مِنْه اشْكَال
مَعاي عَرَبي وَدَمُّهْ حَلال!
بَابِيع عَرَبِي.. بَابِيع عَرَبِي بِفِيزَا وَكَاش
خُد العَرَبِي .. خُدُه ببلاش!
مَعاي عَرَبي بعَرْض جَديد
خُد الواحَد وعَشَرَة عَبيد
ما لوش ديّة ولا تَعويض!
مَعاي عَرَبِي خَرُوف مَجْرُور
يطِيع أَمْرَك .. فِ سَاقْية يَدُور
يعِيش عَبْدَك سِنِين وشُهُور
تَجُرُّه يِمِينْ.. تَجُرُّهْ شِمَالْ
يَبِيع عَمُّه عَشَان المَال
وَآخْرُهْ كَلَام مَا لُوش أَفْعَال!
تَعَال قَرَّب.. تَعَالَى يَا بِيه
مَعَاي عَرَبِي تَدُوسُه زُرَار
يشوف أَهْلُه فِ وِسْط النَّار
لَا عُمْرُه يُومْ يَحَرَّكُهْ عَار
وَلَا بِيْثُورْ عَشان دَمُّه
مَعاي عَرَبي .. عشان القِرش
يبيع وَلَدُه وابوه وامُّه!
خُد العَرَبي.. خُد العَرَبي ده كَلْب مُطيع
ما لوش مِلَّة .. ما لُهْش قَطيع
بابيع جُمْلَة وبالتَقطيع!
تَعَال قَرَّب.. تَعَالَى يَا بِيه
بَابِيعْ عَرَبِي بِدُولَار وَجنِيه
وَفِيه تَخْفِيض وَعَرْض عَلَيه
بَابِيع عَرَبِي وَبِالكِيلُو
مَعَاي عَرَبِي بِتَاكْلُهْ كلَاب
وَاخُوهْ قَاعِد بِيِدعِي لُهْ
وَفِيه تَوْصِيل لِأَي مَكَان
بِكَتَالُوجُه وَكِيسُه كَمَان
مَعَاه عِلْبَة وخِتْم ضَمَان
ح يوْصَل لَّك بِتَقْفِيلُه!
بَابِيعْ عَرَبِي وَعَ السِّكِّين
عَشَان الْقِرْش؛ نَفْسُه يِهِينُ
وبَاعْ أَهْلُه وَبَاع الدِّين!
تَعَال قَرَّب .. تَعَالَى يَا بِيه
مَعَاي عَرَبِي يهاب الحَرْب
أَمِير نَاسُه .. وَمَدَاسْ لِلْغَرْب
بِيِتْدَسّى (بيستخبّى) فِ وَقْت الضَّرْب!
تَعَال قَرَّب .. تَعَالَى يَا بِيه
مَعَاي عَرَبِي حَجَر شِيشَة
خَفِيف وَزْنُه تقُول رِيشَة
يَبِيعْ أَهْلُهْ بِتَحشِيشَة (قعدة حشيش)!
تَعَال قَرَّب .. تَعَالَى يَا بِيه
مَعَاي عَرَبِي قَلِيل الْأَصْل
مَا لُهْش عِلَاجْ فِي يُومْ وَلَا مَصْل
أَخُوه بِيِمُوت وَساكِن قصر
تصّفَّر لُه يقول أشعار
مَعاي عَرَبي بوَصْم العار
ما لوش نَخوَة ولا بيغار
خُدوه مِنّي .. خُدوه تِذكار!