خبر
أخبار ملهلبة

السجن | أحمد فؤاد نجم

الصفحة الرئيسية



السجن

 

 

عِنوان البيت :

ما لهوش عِنوان

ف الدُنيا الواسعة

وف كُل زَمان

ح تلاقوا كتير

عِش وعَصافير

تِعْشَق وتطير

فوق الأحزان

عِنوان البيت:

مِن غير عِنوان

 

عِنوان الشارِع :

"مَصْر" وبَسْ

مِن غير أوْصاف

وسُؤال ودَليل

عِنوان مِن فَرْط الشوق ينحِس

مِن ريحة الأرْض

وعَرَق النيل

سُكّان الشارِع

هُمّا وبَسْ

ولا غيرهُم وَقْت الجَد بَديل

 

الراسِل: شاعِر

عاشِق موت

وشيوعي ومَصْري

بعِلْو الصوت

 

عِنوان العاشِق :

سِجْن "أبو زَعْبَل"

و"أبو زَعْبَل" مَصْلَب للعُشّاق

 

عِنوان الشاعِر:

قَلْب العالَم

والعالَم عامِر بالأشْواق

والشِعْر حُصان

رَغْم القُضْبان

بيلِّف العالَم كَيْف يَشاء

 

"عَزّة":  (يقصد "عزّة بلبع" زوجته آنذاك)

الشِعْر كتير

والبَحْر وَفير

والهَم جبال

والشوق شَلّال

والعِشْق حَلال

واحنا العُشّاق

حَكاوينا كتير

ح اكتِب لِك إيه؟

واحكي لِك إيه؟

 

السِجْن:

ما فيش ف السِجْن زَمَن

الوَقْت:

ما لوش ف السِجْن تَمَن

أيّام بتـمُر

وليل بيـجُر

نهار ويعدّي

واحنا ف دَوّامة

والافكار بتجيب وتودّي

العالَم بَرّه بيعمِل إيه؟

الناس فاكرانا؟

وساكتين ليه؟

الناس بتلاقي العيش ازّاي؟

الناس بتروح الشُغْل ازّاي؟

الناس بتقَضّي اليوم ازّاي؟

الناس بيجيلهُم نوم ازّاي؟

الناس الناس

الناس الناس

شَغَلِتْنا الناس

والناس ويّانا ف كُل وجود

واحنا مَعَ الناس

وعَشَمْنا ف بُكْرَه ما لُـهْش حدود

واكتِب لِك إيه؟

واحكي لِك إيه؟

 

شُفْتِك ف الحِلْم الليلة قَمَر

وانا طير كَرَوان

بجناح مَكْسور

عاشِق وحَبيبي الليلة أَمَر

رَفْرَفْت خَلَعْت الباب والسور

طَيَران .. طَيَران

طَيَران عَلّيت

طَيَران وحَدَفْني الشوق عَ البيت

كَرَوان وغَلَبْني الشوق غَنّيت

حَتِّة غِنيوَة حُب قَمَر

سَلامات يا حَمام يا ابو ألْف جناح

يا معَدّي الساعة ف غَمْضِة عين

عُشّاق وبلاد العِشْق بَراح

والسِكّة أمان طول ما احنا اتنين

مَحبوبتي قَصيدَة مَعَ المَدّاح

وانا غاوي غَناوي وانا ابن يومين

والبَحْر عينيها وانا المَلّاح

يا حَمام وعرِفنا الشَط منين

للغُرْبة ليالي ولينا صَباح

ونمِد الشَمْس ع الشَطّين

رَفْرَف يا حَمام بالألف جناح

وَدّينا لبُكْرَة ف غَمْضِة عين

وصحيت مِن حِلْمي لَقيتني هِنا

باحلم بيكي وانتي معايا هِنا

ف الحِلْم هِنا

ف العِلْم هِنا

ف هزاري ف جَدّي

وكُل ما بادّي

وباخُذ وَيّا الزُمَلا هِنا

واكتِب لِك إيه؟

واحكي لِك إيه؟

 

إحنا اتغَرَّبْنا وتوهنا كتير

وخَلينا العِش من العَصافير

وتَرَكْنا بلاد وسافِرنا بلاد

ومشينا تعِبنا من المَشاوير

عَرَفونا الناس

وعرِفنا الناس

وعاشِرنا كتير

وفارِقنا كتير

وإتْبَدِّل بينا الحال أَحْوال

وركِبنا الصَعْب من الأهوال

زَرَعوا لنا الخوف

عَلى مَدَد الشوف

وغَوونا بشُهْرة ومُهْرة ومال

بَسْ احنا بنِعْشَق مِش بنتوب

وان شا الله ح نِعْشَق لـَمّا ندوب

واحنا اتْعَلِّمنا من العُشّاق

فوق الأحْزان نِحْلَم نِشْتاق

لَوْ عِشْنا ف صَحَرا

ف عِزْ الجَفَرة ونار الصيف

نِحْلَم بالشَجَرة ولَمْس المَيّه ولون الطيف

وان عِشْنا ف ليل السِجن الضَلْمة والسَجّان

نِحْلَم بالصُبْح الحُر يشَقْشَق ع القُضْبان

وان عِشْنا ف قَهْر

يشُق الضَهْر

بسيف القَهْر

نِحْلَم بالثورة

تهِد وتِبْني الدُنيا ف "مَصْر"

 

 

أحمد فؤاد نجم

google-playkhamsatmostaqltradent