حَطّة يا بَطّة (إيه آخرتها مع الظُبّاط)
حَطَّة يا بَطَّة يا دَقن القُطّة
بابا جايْ وشايل الشَنطة
إيه ف الشَنطة؟
فيها ما فيها
غِش وبولوتيكا وأوَنْطَة
حاكم بابا شُغْلِتُه ظابِط
ظابِط هابِط
شابِط لابِط
راقِع خابِط
صايع لاقِط
نازِل شافِط
طالِع لاهِط
عُمْرُه ما فَكَّر فِكْرَة وصابِت
عُمْرُه ما نَبِّتْ زَرْعة وطابِت
يزرع سُكّر يطلَع شَطّة
حَطّة يا بَطّة يا دَقن القُطّة
بابا عشان خَدْها بالمُلْحَق
بَقى ظابِط واتعيِّن مُلْحَق
واترقّى سَفيراً فوزير
إيه السِر؟ .. السِر ف بير
السِر ف طَرْف النَبّوت
واللي يِحل السِر يموت
ياما نِفسي يا بلدنا يا شابّة
يبقوا الوزَرا بفلات فوت
وقلوبهم مَليانة مباسطة
حَطّة يا بَطّة يا دَقن القُطّة
يا بَلدنا يا زادنا وزوّادنا
يا ام جدودنا وبِنت ولادنا
إيه آخرتها مع الظُبّاط؟
بيروقراط على تِكنوقراط
حُكَما .. فلاسفة فَشَر سُقراط
واحنا يا عيني غَلابة بُساط
فردانيّة ما بينّاش رابطة
حَطّة يا بَطّة يا دَقن القُطّة