خبر
أخبار ملهلبة

وقال البحر (آه من هدير البحر) | سيد حجاب

الصفحة الرئيسية

 





آه من هدير البحر

 

 

آه مِن هَدير البَحْر لَمّا يزوم

آه مِن فَحيح الريح لَمّا تقوم

يوم بَعْد يوم طير المَصير بيحوم

والدُنيا ماشية في طَريق مَرسوم

 

الشَمْس حامية ورامية الناس ف سِكّتها

وقلوبنا تِبكي وأَحْلامنا تسَكّتها

ياما بيبان مَقفولين تِفْتَحها أَحْلامنا

ياما بيبان الإيدين الطايشة سَكّتها

 

الموجة دامية ورامية الخَلْق ف التوهة

لَوْ سابوا إيد بَعْض ضاعوا ف سِكّة مَعْتوهة

ياللى انتوا فاكرين ح تاخدوا الدُنيا وَحديكوا

الدنيا واخداكوا ومُش انتوا اللى خَدتوها

 

واهي دايرة بينا الحَياة موجة وَرا موجة

خَلّيكي شاهْدَة يا شَمْس الله عَلى حالنا

مِن حُرْقِة الآه طُرَح أَفْراحنا مَنسوجة

ومِن آمالنا آلامنا المُرّة طارْحَة لنا

واهى دايرة .. دايرة الحياة

 

 

سيّد حجاب


google-playkhamsatmostaqltradent