خبر
أخبار ملهلبة

رأيي صواب يحتمل الخطأ ورأي غيري خطأ يحتمل الصواب والعكس صحيح

 


رجلان مختلفان في الرأي ويجلسان على طرفي مائدة وكلاهما يقرأ ورقة مكتوب عليها 6 أو 9 بالإنجليزية

الاختلاف في الرأي لا يفسد للود قضية




أنا بس الوحيد اللي صح وغيري كله غلط ..

أنا بس الوحيد اللي رأيي مظبوط وغيري ما بيفهمش أي حاجة ..

أنا بس الوحيد اللي باجيب التايهة ف عز ما غيري نايم ف العسل ..

أنا بس الوحيد اللي عارف الحقيقة المطلقة وغيري ما لهوش غير ف الأوهام ..

أنا بس الوحيد اللي وطني وقلبي ع البلد وغيري خاين وعميل ويمكن كمان جاسوس ..

أنا بس الوحيد اللي ذكي وقاري ومطّلع وغيري جاهل ومدّعي وإمّعة ..

أنا بس الوحيد اللي عمره ما عمل حاجة غلط وغيري غلّاط وابن ستين ف سبعين ..

أنا بس الوحيد اللي مؤدّب وأخلاقي عالية وغيري مش محترم وواطي كمان ..

أنا بس الوحيد اللي واعي وعارف الزتونة وفاهم الخلاصة وغيري مضحوك عليه وعايم ف ميّة البطيخ.

#################  

لو حضرتك (أو حضرتِك) بتقرا الكلام ده أكيد ح تفكّر بطريقة من اتنين :

1. الطريقة المؤدّبة: ح تقول لنفسك إني أكيد مريض نفسيّاً بالبارانويا (جنون العظمة) ومحتاج لعلاج يفوّقني من الوهم اللي انا عايش فيه ويعرّفني إني مش عايش ف الدنيا لوحدي وإن الناس كلها بتنظر للأمور من زوايا مختلفة وبتكوّن آراء متعددة مش لازم تبقى متوافقة مع قناعاتي.

2. الطريقة الصايعة: ح تقول لنفسك إني أكيد حمار وما بافهمش وعامل نفسي بني آدم وانا أصلاً ما اساويش نكلة وح تنهي تفكيرك بسرعة بالعبارة الخالدة: "جاتك القرف حيوان .. أهم أمثالك دول اللي جابونا ورا .. إتفوووو عليكم مليتوا البلد".

في الحالتين إنت أكيد اللي صح وأنا بس الوحيد اللي غلط .. يعني انت أكيد بتؤمن إن الناس ممكن تختلف في وجهة النظر بدون ما تتخانق أو تقتل بعض .. وأكيد بتؤمن إن اللي مختلف معاك ممكن يبقى له أسبابه المنطقية للاختلاف ده .. وأكيد بتؤمن إننا مش لمجرّد اختلافنا نبقى أعداء أو ما ينفعش نبقى أصدقاء.

طب إيه رأيك بقى يا حلو إنك بتفكّر بالأسلوب الغلط ده .. وبتبقى مش طايق أي شخص يسمّعك رأي مغاير لرأيك .. وبتقول عليه إنه ما بيفهمش أو عايز يخرب البلد أو على أقل تقدير أهبل ومغيّب .. متهيّأ لي إننا كلنا كده .. من 2011 واحنا جات علينا أوقات كتيرة حسّينا فيها إننا ولامؤاخذة حمير (ربنا يعافينا جميعاً) في مواقف كتيرة واتصدمنا ف ناس كنا مؤمنين بيهم واتأسّفنا لناس كفرنا بيهم .. وده بسبب تغيّر وتلوّن البعض وبسبب سذاجدتنا وعنجهيتنا برضه .. ومع ذلك بنعيد نفس الغلطة بنفس الإصرار واحنا عارفين إننا ممكن نراجع حساباتنا ونغيّر رأينا ف المستقبل بعد أن تتكشّف لنا معطيات جديدة .. طب ما نيجي ما نخسرش بعض ونحاول نتعايش سلميّاً من غير ما نغلط في بعض ونخوّن بعض .. بلاش نقسّم نفسنا لحيوانات وأنعام : إشي إخوان خرفان وإشي سيساويين حمير وإشي علمانيين تيوس وإشي سلفيين بقر وإشي مسيحيين خنازير و .. و .. مع إنهم كلهم بياكلوا برسيم (قصدي ع الحيوانات طبعاً).

باقول الكلام ده بمناسبة إن ناس كتير بينتقدوني لدرجة الشتيمة وناس تانية بيستنكروا آرائي المتواضعة وناس تالتة بينصحوني وخلاص .. طبعاً الكل فوق دماغي .. بس انا باحاول أسجّل آرائي وخواطري يمكن الواحد يقدر ينفّث بيها عن الحريقة اللي جوّاه ويمكن يبقى لها قيمة عند بعض الناس .. ومين عارف يمكن ربنا يحلّها من عنده والكل يرتاح .. وأهي عيشة والسلام.

أرجو إن حضرتك (أو حضرتِك) تقتنعوا بوجهة نظري خصوصاً إن انا بس الوحيد اللي صح!!!

google-playkhamsatmostaqltradent