خبر
أخبار ملهلبة

مش باقي مني | جمال بخيت



مِش باقي مِنّي

 


مِش باقي مِنّي .. غير شويّة ضَيْ ف عينيّا

أنا ح اديهم لِك

وامشي بصبري ف الملكوت

يمكن ف نورهم تلمحي خطوة

تفرق معاكي

بين الحياة والموت

 

مِش باقي مِنّي .. غير شوية قوّة ف إرادتي

علي شويّة شِعر من خطّي

حاسبي عليهم وانتي بتخطّي

وانتي ف صُبح الدلال

بتعطّري شطّي

 

مِش باقي مِنّي .. غير شويّة ضَيْ ف عينيّا

أنا مش عايزهم

لو كنت يوم ح المحك

وانتي بتوطّي

في معركة مافيهاش

ولا طيارات ولا جيش

وانتي ف طابور العيش

بتبوسي إيد الزمن

ينوّلِك لُقمة

من حقِّك المشروع

 

مِش باقي مِنّي .. غير شَهْقة ف نفس مَقطوع

بافتح لها سِكّة

ما بين رئة .. وضلوع

ما بين غبار .. ودموع

وانا تحت حجر المقطّم

ف الدويقة باموت

أنا والعطش والجوع

يئِن تحتي التُراب

وانا صوتي مِش مسموع

يا حلمنا المَوْجوع

من المرور ممنوع

مستنّي لمّا يمر

مَوْكِب سلاطينِك

 

مِش باقي مِنّي .. غير شويّة كُفر بشروقِك

على شويّة رحمة من طينِك

على شويّة صبر من دينِك

 

مِش باقي مِنّي .. غير شوية لحم ف كتافي

بلاش يتبعتروا ف البَحر

بلاش يتحِرقوا ف قطر الصعيد

ف العيد

بلاش لكلب الصيد تناوليهم

خُدي اللي باقي من الأمل فيهم

وابني لي من عَضمهم

في كل حارة مقام

وزوريني مرّة وحيدة

لو كل ألفين عام

أَلَم الجراح يتلم

 

مِش باقي مِنّي .. غير شويّة دَم

متلوثين بالهَم

مُرّين وفيهم سِم

كانوا زَمان شَرْبات

والنُكتة سُكّرهم

شِرْبِتْهُم الخَفافيش

ف قَلْب أوْكارهم

 

مِش باقي مِنّي .. غير شويّة دَم

ما اقدرشي

أسقيكي مواجعهم

وبرضه ما اقدرشي

أرميكي وأبيعهم

يمكن ف مرة تعوزي تطلبيني شهيد

ح احتاج يوميها الدم

يمضي علي شهادتي

 

مِش باقي مِنّي .. غير شويّة نَبْض ف عروقي

خُدي .. وعيشي ..

وافتحي لي تابوت

أفرح بريحة وَرْد فرعوني

وربّنا ف عوني

إذا دخلت الجنة ولّا النار

ح اشتاق إلى ضحكتِك

وقَعْدِتي ف الدار

والقهوة متحوّجة

من طِيبة العَطار

 

ف كل يوم الصُبح

باشرب حليب قِبطي

وف النهار والمِسا

بامسِك سِتار الكَعبة لو سِبْتي

واثبَت إذا هِربتي

 

أهديكي عُمْري وحِسِّي وجوارحي

أهديكي جَرْحي

هوَّ اللي باقي ف دُنيتي

لما خلص فَرحي

 

مِش باقي مِنّي .. غير حبّة غُنا تايهين

ف الضلمة مش لاقيين

حِس الفواعليّة

ولا صوت مراكبي عَفي

فوق المعديّة

ولا صوت بناتي العذارى

في كل صُبحيّة

والغنوة أمنيّة

"ياما نِفسي أقابل حبيبي ..

وانا ع الزراعيّة"

صوتِك وصوتهم غاب

وانا تحت حَجَر المُقطّم باموت لوَحديّا

 

الليلة راحِت عيوني

تطُل ع البُستان

وجناين الرُمّان

رجعِت لي توْصِف عِناد الغِل والدُخّان

وسحابة سودا تضلّل

علي الغُنا الغَلبان

رجعِت لي توْصِف هُبوب الموت

علي الألوان

رجعت لي توْصِف خيال الذُل

ف موائِد الرَحمن

 

مِش باقي مِنّي .. غير شوية كُفر بشروقِك

وانا مَنْبَع الايمان

 

مِش باقي مِنّي .. غير شويّة ضَيْ وعينيّا

مِش قادرة تلمحني

ف وحدتي مَحْني

خايف أموت م الخوف

والضَعف يفضّحني

السجن عشّش ف قَلبي

وماشي ف شوارعِك

نَفْس اللي باعني وخَدَعني

بالرخيص بايعِك

ح اشيل حمولي أنا

ولّا ح اشيل حِمْلِك؟!

ماعُدت أملُك شيء

فيكي ولا فيّا

ولا قيراط ولا بيت

ولا نِسمة صافية تلاغي النيل بحريّة

 

مِش باقي مِنّي .. غير شويّة حُب جارِحني

ولا باقي مِنّي .. غير شويّة ضَيْ ف عينيّا

 

 

جمال بخيت

author-img
ابن أبي صادق

تعليقات

تعليقان (2)
إرسال تعليق
  • Unknown photo
    Unknown28‏/11‏/2020, 1:41 م

    جميله الحقيقه ومعبره ولما اتعملت اغنيه بقت احسن مع صوت قوى زى احمد سعد جميله تحياتى لحضرتك يادكتور واخيارتك الرائعه وكتابتك الجميله جدا

    حذف التعليق
    • ابن أبي صادق photo
      ابن أبي صادق29‏/11‏/2020, 7:40 ص

      فعلاً الكلمات رائعة .. ورغم إن "جمال بخيت" له أشعار جميلة جداً إلّا أن هذه القصيدة تكفي لوضعه بين مصاف أعظم الشعراء والزجّالين حتى ولولم ينظم غيرها .. وأخيراً شكري وامتناني لحضرتك يا باشمهندس على كلامك الجميل.

      حذف التعليق
    google-playkhamsatmostaqltradent