بالورقة والقلم
بالورقة والقلم
خدتيني 100 قلم
أنا شفت فيكي مرمطة
وعرفت مين اللي اتظلم
ليه اللي جاي لِك أجنبي
عارفة عليه تطبطبي
وتركّبي الوِش الخشب
وعلى اللي منِّك تقلبي
عارفة سواد العسل
أهو ده اللي حالِك ليه وصل
إزاي قولي لي مكمّلة
وكل ده فيكي حصل
يا بلد معاندة نفسها
يا كل حاجة وعكسها
إزاي وانا صبري انتهى
لسّه باشوف فيكي امل
طارداك وهيَّ بتحضنك
وهوَّ ده اللي يجنّنك
بلد ما تعرف لو ساكنها
ولّا هيَّ بتسكنك
بتسرقك وتسلّفك
ظالماك وبرضه بتنصفك
إزاي فى حضنِك ملمومين
وانتي على حالِك كده