كَالعااادَة زَيْ كُل يوووم
ظَلَّ المُعَلِّمُ
"عَبْدُ الآخِرِ زيادَة" واقِفاً أَمامَ بابِ شَقَّتِهِ كالعااادَةِ
فَوْقَ الخَمْسِ دَقائِقِ يَبْحَثُ عَنْ مِفْتاحَيْهِ وَسْطَ سِلْسِلَةِ
مَفاتيحِهِ التي تَضُمُّ ما لا يَقِلُ عَنْ خَمْسَةٍ وعَشْرينَ مِفْتاحاً تَخُصُّ
طَبْلَتَيْ بابِ المِنْزِلِ وطَبْلَةَ بابِ العِمارَةِ وتَشْغيلَ السَيَّارَةِ
وفَتْحَ شَنْطَتِها والإنْذارَ ضِدِ السَرِقَةِ وقُفْلَيْ الجَراجِ وأَقْفالَ
المَحَلِ السِتَّةَ وأَدْراجَ المَكْتَبِ الأَرْبَعَةَ والخَزْنَةَ الحَديديَّةَ
وقُفْلَ الهاتِفِ بالعَمَلِ وبَعْضَ المَفاتيحِ الثانويَّةِ الأُخْرَى كمِفْتاحِ
صُنْدوقِ البَريدِ ببَهْوِ العَمارَةِ ومِفْتاحِ سَطْحِ العَمارَةِ ومِفْتاحِ
ضَلْفَةِ بابِ دولابِ حُجْرَةِ النَوْمِ ومِفْتاحِ دَوْرَةِ المياهِ الخاصَّةِ
بمَحَلِّ بَيْعِ قِطَعِ غيارِ السَيَّاراتِ الذي يَمْتَلِكُهُ بِوَسْطِ المَدينَةِ
و.. و..، وبَعْدَ أَنْ دَخَلَ مَنْزِلَهُ أَخيراً وَجَدَ امْرَأَتَهُ وبَناتِهِ
الخَمْسَةَ في شَرَفِ اسْتِقْبالِهِ كالعااادَة فَأَقْرأَهُنَّ السَلامَ
والتَحيَّة، وبَعْدَ أَنْ اطْمَأَنَّ عَلَى صِحَّةِ زَوْجَتِهِ الحامِلِ في
تَوْأَمٍ سَأَلَها وهوَ يَزْدَرِدُ ريقَهُ الجاف :
- الغَدا جاهِز؟
- أَيْوَه يا سي
"عَبْدُه" خُشْ اقْعُد عَ السُفْرَة عَلَى طول زَيْ كُل يوووم.
- بِسْم الله
الرَحْمَن الرَحيم.. الله!.. هوَّ فين الأكْل دَه يا وليَّه؟.. حَدْ قال لِك إنّي
عامِل ريجيم؟
- مَعْلِهش يا
خويا.. ما لَحَقْتِش اعْمِل غير مُلوخِيَّة بالأنارِب وطاجِن بامْيِة باللَحْمَة
الضاني وحَلِّة قُلْقاس بالفِراخ وصينيِّة رُقاق بالعَصَّاج وشويِّة رُز
ومَكَرونَة.. أَصْلي النَهار دَه كان وَرايَّ هَمْ ما يِتْلَم.. كُنْت شايْلَة
البيت شيل.. كَنَسْت وسَيَّأْت ونَفَّضْت البيت كُلّه.. دَه انْتَ ما كُنْتِش تشوف
البَلاط مِنْ كُتْر المَيَّه بتاعِة التَسْيئ.. دَه غير إنّي غَسَلْت السَجاجيد
كُلَّها فِ البَلَكونَة لِدَرَجِة إنْ المَيَّه اللي نازْلَة مِ المُزْراب وَصَلِت
لأَوِّل الشارِع.
- ودَه يَخَلِّيكي
ما تِعْمِليش أكْل عِدِل بَرْضُه؟.. مِشْ كِفايَة مقَضِيّينْها امْبارِح بأكْل
أَيْ كَلام بِحِجِّة إنِّك كُنْتي عَنْد اخْتِك اللي وِلْدِت وجِبْنا مِنْ بَرَّه
شويّة سَمَك وسُبيط وجَمْبَري وكابوريا ما يرُمُّوش العَضْم.. دَه احْنَا خَسِّينا
وعِدِمْنا واتْسَلِّينا فَشَر أَطْفال المَجاعات اللي فِ "إفريقيا" يا
وليّه.. دَه انْتي عَلَى كِدَه حَ تنَشِّفينا فِ رَمَضان اللي داخِل عَلينا اهُه.
- لأَه ورَبِّنَا
المَعْبود.. دَه انْتَ حَ تلاقيني كُل يوم عامْلَة لَك المِشَمَّر والمِحَمَّر
والمِعَمَّر والمِقَمَّر والمِسَكَّر وكُلْ شِي فيه عَنْبَر.. زَيْ العااادَة فِ
كُل رَمَضان.. مَعْلِهش امْسَحْها فيَّ النَهارْ دَه.. قول لي بَقَى.. إنْتَ
رَجَعْت بَدْري ليه كِدَه؟
- أَبَداً.. الشُغْل
كان نايِم.. أَنا يا دوب فَتَحْت المَحَل الصُبْح وغَرَّقْت الشارِع قُدَّام
المَحَل بِخَرْطوم المَيَّه وطَلَبْت لي ييجي أَرْبَع كوبَّايات قَهْوة زيادَة عَلَشَان
افَوَّق مَطْرَح السَهَر امْبارِح وأَرْبَعَ كَراسي معَسِّل زَيْ كُل يوووم.. وما
بِعْتِش غير بِميتين وخَمْسين جِنيه بَسْ.. قُمْت قايِل واللهِ لاجيب دُرَفْها..
ورُحْت واخِد العَرَبيَّة وطَلَعْت عَلَى الطُلُمْبَة غَسَلْتَها بالمَيَّه
والصابون كَذا مَرَّة وشَـحَّمْتَها مَرِّتين وفَوِّلْتَها بَنْزين وقَعَدت أَلِف
بيها ساعَة كِدَه سَلانْسِيه إكْمِنِّي كُنْت زَهْقان شوَيِّتين.. وبَعْدين جيت
عَلَى هِنا.
- طَبْ وما سيبْتِش
صَبِيَّك فاتِح المَحَل ليه؟.
- أَنا مَشِّيتُه
أَوِّل امْبارِح.. ابْن الحَرام ما بيسْمَعْش الكَلام.. أَصْلي زَيْ كُل يوووم
قَبْل ما اروح اسْهَر عَ القَهْوَة باقول لُه لَمَّا تيجي تِقْفِل الدُكّان سيب
نور المَحَل كُلّه منَوَّر وخَلِّي يُفَط المَحَل كُلَّها والْعَة وسيب الراديو
شَغَّال طول الليل عَلَى إذاعِة القُرْآن الكَريم عَلَشَان يحْفَظ المَحَل مِ
السِرْقَة.. ما فيش فايْدَة.. آجي افْتَح تاني يوم أَلاقي كُل حَاجَة مَطْفِيَّة..
قال إيه حَرام.. حُرْمِت عَليه عيشْتُه.. عايِز يوَفَّر لي فِ الفَواتير بروح
امُّه.
- عَلَى فِكْرَة..
فاتورِة الكَهْرَبا جَتْ رُبْعُميَّة وتَلاتين جِنيه الشَهْر
دَه دَفَعْتُهُم
مِنْ مَصْروف البيت كالعااادَة.. ما تِنْسـاش تِدِّيهُمْ لي مَعَ المِيتين جِنيه
بِتوع فاتورِة المَيَّه.. وعايْزَة كَمان سُبْعُميَّة وسِتِّين جِنيه عَلَشَان
اروح ادْفَع التِليفون بُكْرَه.
- بَسْ!.. كوَيِّس
واللهِ.. شُفْتي بَقَى لَمَّا بَطَّلْتي انْتي وبَناتِك رَغْي فِ التِليفون كُل
شوَيَّة.. آديكي وَفَّرتي فوق التُلْتُميَّة.. مِشْ احْنَا أَوْلى بيهم بَرْضُه.
- آه.. بَسْ عايْزين
خُمْسُميت جِنيه نِشْحِن مُوبايْلاتْنا.. عَلَشَان الرَسايِل بِتاعِة رَمَضان
والعيد.. رَبِّنَا ما يقْطَعْ لَك عااادَة.
- ماشي.. وفَكّريني
كَمان أَدِّيكي مَصاريف الأكْل فِ رَمَضان ومَصاريف كَحْك العيد ومَصاريف هُدوم
العيد وبالمَرَّة مَصاريف كِسْوِة الشِتا ومَصاريف المَدْرَسَة واللِبْس والشُنَط
الجِديدَة زَيْ عااادِة كُل سَنَة.. هَه.. يا للا.. الحَمْدُ لله.. أَهي أكْلَة
والسَلام.
- أَلْف هَنا
وشِفا.. روح انْتَ اقْلَع هُدومَك عُقْبال ما جيب لَك بيجامَة نِضيفَة مِنْ عَ
الحَبْل.
- طَبْ ما تِنْسيش
تعَلّقي عَ الشاي وتحُطِّي لي فيه خَمَس مَعالِق سُكّر كالعااادَة.. عَلَشَان
احْبِس بيه عَلَى كام سيجارَة قَبْل ما انام لي التَلات ارْبَع ساعات بِتوع
الضُهْر زَيْ كل يوووم.
- ما بَلاش يا خويا
السَجايِر اللي نَشِّفِت دَمَّك دي.. اجيب لَك بَقِيِّة عِلْبِة السِمْسِميَّة
والفُولِيَّة والحُـمُّصيَّة بتاعِة حَلاوِة نُصْ شَعْبان بَدَل ما تِتْرَمَى
بحالْها حَرام؟
- يا وليِّه دَه انا
ما شرِبْتِش مِ الصُبْح غير عِلْبَة ونُصْ سَجايِر بَسْ
.. عُمُوماً هاتي لي
عِلْبِة الحَلاوَة بَرْضُه.. أَهو الواحِد يحَلِّي بُقُّه بحَاجَة بَعْد الأكل
زَيْ كُل يوووم.. عُقْبال ما ابْقَى اجيب شوَيِّة فاكْهَة وانا راجِع مِنْ سَهْرِة
القَهْوَة.
- يا راجِل ما بَلاش
قَهْوَة الليلَة دي.. واقْعُد مَعانا انا والبَنات نِتْفَرَّج عَ التِليفزيون..
دَه احْنَا كُل يوووم باللِيل بنِتْفَرَّج ييجي عَلَى عَشَر أَفْلام
ومُسَلْسَلات.. أَحّيه.. أُمَّال حَ نِبْقَى نِعْمِل إيه فِ رَمَضان؟.. دَه احْنَا
بنُقْعُد قُدَّام التِليفزيون مِنْ بَعْد الفِطار لِحَدْ السُحور..
والتِمْثيليَّات اللي ما بنِلْحَقْش نتابِعْها بالليل بنْشوفْها فِ الإعادَة
بتاعِة الصُبْح.
- لا يا خْتي.. سيبوني انا فِ القَهْوَة وخَلِّي لكُم انْتَم التِليفزيون وتِمْثيليَّاتُه العَرَبي والتُرْكي.. بَسْ اعْمِلي حسابِك أَرْجَع مِ القَهْوَة أَلاقيكي وَضَّبْتي العَشا ونَيِّمْتي البَنات عَلَشَان حَ اعوزِك فِ كِلْمَة سِرْ بينَّا كالعااادَة زَيْ كُل يوووم.