حوار متشابك بيني وبين نفسي وذاتي
أرجوكم ما حدش يتدخّل بيننا علشان الخلافات
ما توسعش والمشاكل ما تكبرش .. وعلى رأي نجاة الصغيرة (اللي بقت كبيرة جداً قوي
خالص) : "مهما الأيّام تعمل فينا ما بنستغناش عن بعضينا .. ما بنستغناش أبداً
أبداً .. ما بنستغناش عن بعضينا .. قد ما نتخاصم يا عوازل أهو حبة بحبة بنتنازل ..
أرجوكوا سيبونا ح تلقونا بنصالح بعض لوحدينا" .. الحوار ده دار امبارح
بالليل:
-أنا : السلام عليكم.
- نفسي : وعليكم السلام.
- ذاتي : أهو سلام وخلاص.
- أنا : جايب لكم أخبار جديدة.
- نفسي : خير؟
- ذاتي : ياما جاب الغراب .. قول يا
خويا.
- أنا : خلاص أعلنوا رسمياً فوز السيسي
برياسة مصر أربع سنين جايين.
- نفسي : يا سلام .. جبت التايهة يا خي
.. عادي .. ما كلنا عارفين إنه ح يفوز.
- ذاتي : الحمد لله .. ربنا سوّد وشكم
ونصَف السيسي حبيب الملايين.
- نفسي : ملايين مين يا عم ؟ .. إحنا ح
نضحك على بعض .. ده كل اللي راح ينتخب يا إما واخدين فلوس يا إما خايفين من
الغرامة يا إما منتفعين من الأوضاع الزفت اللي في البلد .. بلا خيبة.
- ذاتي : خيبة لمّا تركبك يا بعيد ..
شاهد يا "أنا" ؟
- أنا : لا لأ .. ما لكش حق يا
"نفسي" .. "ذاتي" عنده حق .. ما تنكرش برضه إن فيه ناس كتيرة
انتخبته علشان بتحبه ومقتنعة إنه أصلح واحد لحكم البلد ده الوقت.
ذاتي : قول له الحمار.
- نفسي : دول مضحوك عليهم ومش عارفين
مصلحة البلد.
- ذاتي : برضه ! .. يعني ما فيش فايدة
.. وانت لمّا كنت مستبشر خير بالإخوان ما كانش مضحوك عليك؟ .. يا إخواني .. يا ابن
المحظورة .. يا عميل.
- نفسي : واللهِ إنت اللي فلول وخدام
للسيساوية .. يا معفن .. يا خاين.
- أنا : عيب يا جماعة ما يصحش كده ..
احترموا وجودي بينكم ع الأقل .. إحنا مش تبع حد .. إحنا همّنا كلّه ع البلد وبس ..
إنسوا اللي فات وحاولوا تصفّوا نيّتكم شويّة .. إدعوا بس إن ربنا يوفّق أي حد يمسك
الرياسة علشان ينهض بالبلد.
- ذاتي : ننهض؟ .. هههههه .. فكّرتني
بمشروع النهضة اللي طلع في مؤخرة الطائر.
- نفسي : تصدّق إنت قليل الأدب .. وانا
غلطان اللي حارق دمي علشانك وعلشان أمثالك .. روحوا في داهية إن شا الله تخربوها
وتقعدوا على تلّها .. أنا راجل صاحب عيا وعندي مشغولياتي .. مش تافه زيّك.
- ذاتي : إنت اللي حقير .. ولو سبنا لك
البلد ح تطربق فوق دماغك .. يا بتاع النهضة يا منهوض .. إلهي نهضوا عليك ساعة
وانفضّوا يا بعيد.
- أنا : يا جدعان صلّوا ع النبي .. ما
هي لو خربت أو اتطربقت ح نخسر كلنا .. يا فرحتي حد فيكم يكسب الرهان على حساب
التاني ويخسر بلده .. أنا عن نفسي مستعد أخسر أي رهان واطلع ما بافهمش حاجة بس
يفضل وطني سالم متعافي علشان خاطر مستقبل أولادنا.
- ذاتي : طب بذمتك مش السيسي ده بطل
قومي وراجل زي العسل وعمل إنجازات ضخمة؟
- نفسي : ما بلاش إحراج بقى .. ده بوّظ
الدنيا .. ولا انت شايف إيه يا "أنا"؟
- أنا : واللهِ أنا شايف إنه عمل حاجات
كويّسة في أوّل فترة : زي إلغاء الدعم في خطوات سريعة حاسمة بدون ما يبكي على
شعبيته اللي فعلاً انخفضت بسبب معاناة الناس ودي كانت خطوة شجاعة وفّرت مليارات
كانت حمل على البلد .. وكمان الاحتياطي النقدي زاد بطريقة غير مسبوقة .. ده غير
بعض المشاريع السكنية والتنموية الجيدة.
- ذاتي : شفت يا راجل يا حصاوي.
- أنا : استنى بس .. ما تنساش إن فيه
حاجات كتير كان ممكن يعملها وما عملهاش : زي مراعاة الغلابة والعدالة الاجتماعية
بين الطبقات وتعيين الحد الأدنى والأعلى للرواتب والحرية اللي ما زالت منقوصة ..
غير الحاجات اللي انا شايفها غلط : زي استيراد أسلحة بالهبل وعدم تطوير المرافق
الأساسية وعدم الاستغلال الأمثل لتبرعات أهل الخليج وعدم الصرف بحكمة على بعض
المظاهر الفرعية ومحاباة الجيش والشرطة والقضاء وترك الفاسدين دون حساب وعدم تطهير
الإعلام.
- نفسي : يعني مش نافع أهه.
- أنا : أنا ما قلتش كده يا مفتري .. من رأيي كمواطن بيحكم على أداء رئيسه: السيسي ياخد 4 من 10 في فترته الأولى .. خلّونا ندعي له ياخد 10 من 10 في الفترة التانية بقى .. وأكيد ح ينوبنا من الحب جوانب مش جانب واحد .. وبعدين الراجل ما لهوش حجة خلاص .. هوَّ المتحكّم في البلد وهوَّ الآمر الناهي فيها والناس مستحملة الظروف على آخرها .. ولو ما قلّلش من إخفاقاته وكتّر من إنجازاته التاريخ مش ح يرحمه .. ربنا يوفّق مصر وحاكم مصر وشعب مصر .. إحنا مش عايزين أكتر من كده .. وقوموا بقى حبّوا على راس بعض وما تفكّروش غير في اللي ممكن نقدّمه لبلدنا من مساعدة للريّس وكل المسؤولين اللي معاه .. والمساعدة دي ما تبقاش في صورة مدح وتطبيل بس .. لأ طبعاً لازم نساعدهم بتأييدهم في قراراتهم الصائبة وانتقادهم في قراراتهم الخاطئة .. وده واجبنا .. ولّا إيه يا نفسي انت وذاتي؟ .. ربنا يهديكم بقى وتسيبوني أعيش في راحة بال شوية .. ح نفضل لغاية إمتى عايشين في الهري والنكت ده .. يا ختاااااااااي.