آه يا واد يا "مؤمن"
يا راااااجل!!!!! .. بقى البوذي ح يدخل
الجنّة علشان "بيؤمن" بإله واحد وباليوم الآخر وبالعمل الصالح؟ .. طب
وبالنسبة للهندوسي اللي "بيؤمن" بالإله "شيفا" وبالحياة بعد
الموت وبالعمل الصالح؟ .. والمجوسي اللي "بيؤمن" بالإله "أهورامزدا"
وبالحياة بعد الموت وبالعمل الصالح؟ .. والسيخي اللي "بيؤمن" بالإله "إيك أونكار" وبالحياة بعد الموت وبالعمل الصالح؟ .. والفرعوني القديم اللي كان "بيؤمن"
بالإله "آمون" وبالحياة بعد الموت وبالعمل الصالح؟ .. يا ترى "المؤمنين"
دول كلهم ح يدخلوا الجنة مع البوذي اللي "بيؤمن" ببوذا برضه؟
حضرتك ما تعرفش إن الديانات دي كلها ديانات
وثنيّة وليست سماويّة .. وأن بها كثير من المعتقدات التي تشرك بالله الواحد الأحد
.. وأن بها الكثير من الطقوس التي لا تؤمن برسولنا الكريم بل برُسُل آخرين لم
يذكرهم الله في كتابه .. وأن بها تقديس لدرجة العبادة لبعض التماثيل والأصنام
(كبوذا وكريشنا وجوروناناك) ولبعض الحيوانات (كالبقر والكلاب) ولبعض الجماد أيضاً
(كالنار والشمس) .. وأن بها بعض العقائد المُلزِمة لمَن يتبعها والتي أنكرها
الإسلام (كتناسخ الأرواح والأناتمان) .. وأن بها كتباً ونصوصاً مقدّسة خاصّة بها وينكرون
القرآن والإنجيل والتوراه؟
طب حضرتك ما سمعتش الآية رقم (48) في سورة
"النساء" التي يقول فيها الحق: "إن الله لا يغفر أن يُشرَك
به ويغفر ما دون ذلك لمَن
يشاء ومَن يُشرِك بالله فقد افترى إثماً عظيماً"؟
أكيد تعرف كل ده لإنك راجل أكثر مني علماً
وثقافةً ومطالعة .. بس مشكلتك (زي ناس كتير: نوال السعداوي وخالد منتصر ويوسف
زيدان وحتى رضا عبد العال) إنك لمّا بتطلع في وسائل الإعلام وبتمسك الحديدة بتخش ف
مواضيع مش بتاعتك وبيبقى كل تركيزك في إطلاق تصريحات مدويّة تشغل الرأي العام وتلفت
النظر تجاهك علشان يستضيفوك في كل القنوات وتبقى ضيف دائم على كل البرامج .. وطبعاً
ما ينفعش تفرقع تصريحات في مجال الاقتصاد (علشان ما تعرفش فيه) ولا في مجال العِلم
(علشان ما حدّش مهتم به أصلاً) ولا في مجال الفن (أحسن تطلع لك الرقّاصة إيّاها
تمسخرك) ولا في مجال الرياضة (أحسن الجماهير تلسوعك) ولا في مجال السياسة (أحسن
الريّس يشلوحك) .. يبقى ما فيش غير مجال الدين الغلبان اللي ما لوش حد يدافع عنه ..
يا دكتور: هوَّ كل واحد بيطلع في التليفزيون ح يفتي على روحه بالمنظر ده؟