بيانات على تذكرة مسجون
الاسم: صابر .. التهمة: مصري
السن: أجهل أهل عصري
رغم انسدال الشيب ضفاير ضفاير
من شوشتى لمـّا لتحت خصري
البشرة: قمحى .. القَد : رُمحى
الشَعر: أخشن م الدريس
لون العيون: إسود غطيس
الأنف: نافر كالحصان
الفم: ثابت ف المكان
ولـمّا جيت أزحزحه عن مطرحه
كان اللى كان
المهنة: وارث عن جدودي والزمان
صُنع الحضارة والنضارة والأمان
جِـهة الميلاد: ف أي أوضة مضلِّمة
تحت السما
على أرض مصر
من أي دار وِسط النخيل
مطرح ما يجري النيل
ما دام ما يكونش قصر
الحُـكم: من سبع تلاف سنة
وانا راقد سجين
أطحن على اضراسي الحجر
من الضجر .. وأبات حزين
الإفراج: سألني سائل
حَبْسِتك طالت .. وليه؟
لإنى طيّب وابن نكتة وابن إيه
ما فيش مخالفة ركبتها ضد القانون
لإنى خايف والقانون سيفه ف إيديه
تسأل عليَّ المخبرين ف أي حين
تسمع وتفهم قصتي ألف وبيه
الاسم: صابر ع البلا .. أيّوب حمار
شيل الحمول من قسمتى والانتظار
أغرق ف أنهار العَرَق طول النهار
وأَلِـم هَمّي ف المِـسا وارقُد عليه
عرفت ليه؟