خبر
أخبار ملهلبة

سرسب .. ودور يا زمن | سيد حجاب

الصفحة الرئيسية



سرسب .. ودور يا زمن



سرسب في ليل وِحدتنا سرسب

وسيب .. وسيب على جبينّا أثر خطوتك

وبعد شمس العصر ييجي الأصيل

والليل طويل فين يا نهار زهوتك

 

لا الحزن .. لا الحزن باقي ولا الشباب بيدوم

وازّاي يا قلبي دنيتك غرّتك

وعِشت ليه ف الوهم

يوم بعد يوم

دور يا زمن دور

دور وخدنا ف دايرتك

 

سرسب في ليل وِحدتنا سرسب

وسيب .. وسيب على جبينّا أثر خطوتك

 

دور يا زمن

ودور يا زمن

وخدنا ف دايرتك

وإن عاكستك خطاوينا أو سايرتك

ح تدور بنا يا زمن

ح تدور بنا

وتجيب آخرنا ولا نجيب آخرتك

دور يا زمن

ودور يا زمن

وخدنا ف دايرتك

 

لا الجرح باقي

ولا الحياة تنتهي

ولو انتهى يوم .. يوم جديد يبتدي

وبعد ضلمة ليلنا ح تزهزهي

يا دنيا مع طَلعة صباحنا الندي

 

ح نعيش يا قلبي مع ذكريات الهوى

وح تنطفي ويّا السنين قَهرتك

ونكون سوا من غير ما نبقى سوا

دور يا زمن

ودور يا زمن

وخدنا ف دايرتك

 

 

سيّد حجاب

google-playkhamsatmostaqltradent