أراجوز
فنّان .. أيوه .. إنما أراجوز
و يجوز يا زمان أنا كنت زمان
غاوي الأرجزة طياري .. يجوز
إنما لمّا الكيف بقى إدمان
باجي أبص لشيء واحد أرى .. جوز
أرا إيه؟ .. أرا إيه؟ .. أرا أرا
أراجوز
***
فلسان .. كحيان .. أيوه أنا فلسان
إنما برضك .. راجل إنسان
باضرب بالألف لسان ولسان
وباكلها بعرقي .. ومِش إحسان
راجل والرجوليّة لا عضلات
و لا ألابندا وسيما وحركات
الرجوليّة الحقيقيّة ثبات
قدام جبونيّة أي جبان
***
أراجوز انا واحمي أرا أرا إيه؟
أحمي قراريط الناس من مين؟
م الناس الأرا أر إيه أرا إيه؟
م الناس القراميط الملاعين
ما هو أصل انا مش م الأرا أرا إيه
مش م القراطيس
ولو الحال مال ما اقعدش انا على
أرا إيه أرا إيه؟ .. قرافيصي واطنّش ع
الأندال
لازم اشك الأندال مهموز
و أدوس ع اللي افترى والعنطوظ
ما انا أرا إيه أرا إيه؟ .. أرا أرا أراجوز
***
أراجوز .. وشجيع .. والدنيا ميدان
فارس .. حارس .. واقف ددبان
وإذا بان للشر نيبان وزَبان
باحمي الغلبانة والغلبان
وشجاعتي ما هيّاش ف الطاخ طيخ
دي شجاعة تفكير وتماخميخ
الأرض أضربها تجيب بطيخ
بذكاوتي واخلي الخلا بُستان
***
أراجوز انا .. والدنيا أرى إيه؟
قرشانة واحنا شِبر شبيط
ياما قرمتني وأرا أرا إيه؟
قرصتني ف لباليبي وانا كبير
فسرحت أنفخ أرا إيه أرا إيه؟
أراغيلها واغني يا ليلي يا عين
و اتمسخر على أرا إيه أرا إيه؟
أرازلها الفَجَرة الطمّاعين
و أضحَك كل صبي وعجوز
ع اللي بيتنطّط فرقع لوز
ما انا أرا أرا إيه؟ .. أرا أرا أراجوز
***
أراجوز .. وسايقها هبل ف جنان
وانا قلبي ملان جَدْعَنة وحنان
وأبان ساهي سهتان سهيان
إنما عقلي للعدل ميزان
أنا فلتة .. إنما مش فَلتان
وساعات حرنان .. وساعات زنَّان
يمكن علشان وحداني
ما ليش أراجوزة تاخدني بالأحضان
***
أراجوز انا .. وأقدر أرا أرا إيه؟
أراعيكي واشيلِك ف عيوني
واذا مرّة زعلتي أرا أرا إيه؟
أراضيكي بعقلي وبجنوني
حُطِّي من السما على أرا أرا إيه؟
أراضيّا واسلِّم لِك أمري
وكُلِي معايا في أرا إيه أرا إيه؟
قروانتي يا كروانة عمري
وبَدَل منا كده ملوي البَزبوز
أصبح لك جوز معزوز محظوظ
إيه يا ترى إيه؟ .. أرا أرا أراجوز
أرا إيه؟ .. أرا إيه؟ .. أر أرا أراجوز