دوام الحال مش محال .. وطول ما انت طبّال وانا زمّار ح تجمعنا الموالد
طب وبعدين؟ .. ح نفضل كده في الدايرة المفرغة دي لغاية إمتى؟ .. بقى لنا سبعييييييين سنة بنلف وندور وف الآخر بنفضل ف نفس المربّع "صفر" وربما أسوأ .. العالم كلّه تقريباً بيتقدّم ويتطوّر واحنا محلّك سر أو ما يشبه "خطوة تنظيم في المكان" حيث يحرّك الشعب قدميْه بإيقاع المسير وكأنه يمشي دون أن يبرح مكانه .. جيل ورا جيل عمره بينقضي واحنا زي ما احنا ما بنتغيّرش .. كل رئيس بيسلّم التاني نفس الإرث المُر ونفس السياسة الخرقاء .. بيلقّفوا الشعب لبعض ما بين اليأس والرجاء .. أوّل ما ييجي الواحد منهم يقول إنه مستلم البلد خربانة ويصدم الشعب ويقول له: "ما فيش .. هوَّ كده .. ح اجيب لكم منين؟ .. دي حكمة ربنا وإرادته .. خلقنا فقرا" .. قال يعني السبب مش في فشل اللي قبله وسوء إدارته للبلد .. وبعد كام سنة من ولايته يقول: "كله تمام والرخاء قادم .. واحنا عدّينا عنق الزجاجة .. وفاضل تكّة وتروق وتحلى .. بس سيبوني كام سنة كمان" .. وبرضه يفضل الحال على هُو الحال والطحين على عياره لغاية ما يتّكل على الله وييجي اللي بعده يقول نفس الكلام .. واحنا بس اللي بنعاني من حلو الكلام وحنضل الواقع .. لو مش مصدّق اتفرج على الفيديو ده وشوف كلام وأفعال أوّل واحد وآخر واحد منهم بس (وطبعاً اللي ما بينهما ما يتخيّروش عنهما) .. يا رب خُدنا بقى وسيبهم من غير شعب يحكموه يمكن يعرفوا إنك الحق العادل.