هل تسعدنا هيئة الترفيه والنهي عن المنكر برؤية شاكيرا وميا خليفة على أرض الحرمين؟
أيوه بقى .. بلا إسلام بلا دياولو .. خلّينا بقى نشِم نَفسْنا ونعيش شويّة زي الغَرب المتطوّر .. ملك وأمراء السعودية الجديدة (معقل الإسلام) ح ينعنشوا الشعب وأوّل الغيث قطرة: المطربة الأمريكية "ماريا كاري" والدي جى الإيطالي "تيستو" والمغني "فيفتي سنت" وفرقة "باك ستريت بويز" وغيرهم بعد "تامر حسني" و"ماجدة الرومي" (واللي اتكلف استقدامهم ملايين الريالات) .. وفي الطريق بكره عروض الباليه وراقصات الريش من لاس فيجاس وفاتنات الرقص الشرقي ومطربو المهرجانات من مصر والشام وربما ما هو أكثر .. وأهو ساعة لربك وعشر ساعات لقلبك .. ما حدش واخد منها حاجة وساعة الحظ ما تتعوّضشي .. هوَّ ده الإسلام الوسطي والانفتاح العصري والانفشاخ التنويري اللي المسلمين محتاجينه .. مش مهم ناخد من الغرب الحاجات الضارة الوِحشة التانية زي التقدم العلمي لا سمح الله أو الديمقراطية والعياذ بالله أو حقوق الإنسان حاشا لله .. بكره الأراضي الحجازية المقدسة بدل ما تحيي ليالي رمضان بالتراويح والتهجّد وقيام الليل والابتهالات والتواشيح ح تحييها بحفلات ريحانة وجاستين بيبر وإمينم ودريك ومحبي برينس .. والبرينس ده كان مطرب أمريكاني مات من جرعة مخدرات زيادة 2016 .. يعني مش قصدي خالص على البرينس MBS طال عمره.