خبر
أخبار ملهلبة

يا اسكندرية | أحمد فؤاد نجم

الصفحة الرئيسية

 


يا اسكندرية

 

 

يا اسكندرية

بحرِك عجايب

ياريت ينوبني م الحب نايب

تحدفني موجة

على صِدر موجة

والبحر هوجة

والصيد مطايب

أغسل هدومي

وانشر همومي

على شمسة طالعة

وانا فيها دايب

كأني فلّاح من جيش عرابي

مات ع الطوابي

وراح ف بحرِك

كأني نسمة فوق الروابي

م البحر جاية

تغرق ف سحرِك

كأني كلمة من عقل بيرم

كأني غنوة من قلب سيّد

كأني جوّه المظاهرة طالب

هتف بإسمِك

ومات معيّد

كأني صوت النديم ف ليلِك

بيصحّي ناسِك

يشدّوا حيلِك

كأني طوبة من بيت ف حارة

كأني دمعة ف عيون سهارى

كأني نجمة فوق الفنارة

تهدي الحيارى

والبدر غايب

يا اسكندرية

يامصراوية

على سِن باسم

على ضحكة هالّة

البحر شبّاك ومشربيّة

وانتي الأميرة

ع الدنيا طالّة

يا اسكندرية عاشق وبدّي

ارتاح ف حضنِك

والوِد وِدي

يكون كلامي

عربون غرامي

وبالمحبة

ناخد وندّي

يا اسكندرية فيكي الغلابة

ع الرزق يسعوا ولا يناموش

صبح صباحهم

رجع مساهم

وزاد شقاهم

وما ارتاحوش

يا عيني ع اللي الزمان تعبهم

وضاع تعبهم

وما التقوش

نزل شبكهم

ف بحر طامي

طلع شبكهم

على فاشوش

وفيكي بين البشر ديابة

وفيكي فوق البشر وحوش

وفيكي ناس مُغرمين صبابة

لو خان زمانهم ما بيخونوش

وفيكي خمري

سلِّمت أمري

ما اقدرش اشوفه

وما اغنيلوش

سمك يا بُنّي يا اسكندراني

ف العِشق واحد

ما لكش تاني

سمك يابُنّي يا اسكندراني

ف الحُسن ساحر ومِعْجِباني

سمك يا بُنّي

والعِشـق غيّة

تبدأ بنظرة

تبقى ملاغيّة

وكل عاشق وله بهيّة

وكل شاعر وله أغاني

وانا اللي عِشق الصبايا كاري

أعشق واغني ما اقدرش اداري

وأي نظرة بتجيب قراري

وايش حال عيونك

يا الاسمراني

 

 

أحمد فؤاد نجم

google-playkhamsatmostaqltradent