خبر
أخبار ملهلبة

بشرى للمصريين: إنشاء سجن جديد في سيناء

الصفحة الرئيسية


خبر عن إنشاء مجمع سجون جديد بالجفجافة بسيناء في مصر




أيوه كده بقى .. هيَّ دي المشاريع التنموية اللي تفيد البلد وشعبها .. يا سلاااااام .. كده الواحد يطمّن على مستقبل ولاده .. ح يتسجنوا في سجن جديد واسع وبِرِح .. شبابيكه بحري وستايره حرير ف حرير.. ويا ريت كمان تبقى الجدران لونها بمبة مسخسخ .. وكلاب الحراسة لولو أو جريفون فرنساوي .. واليونيفورم بتاع الظبّاط والعساكر بوستيج ف بندقي.

ح يطلع فيكم واحد كافر داعر رعديد زنديق شلولح يقول لي الأرض دي كان الأوْلى يدّوها للشباب العاطل اللي بيروح يتطوّع ف داعش من كُتر يأسه .. أو يقول إن المرافق (المياه والكهربا والغاز والطرق) اللي ح توصل للأرض دي ح تتكلّف ملايين من فلوس الشعب الغلبان .. إخرس خالص .. ما اسمعش صوتك خالص يا عميل يا كُخّة .. الملايين دي ح تدفعها الحكومة ربنا يخلّيها لينا أو القوّات المسلّحة ربنا يسلّم أياديهم كمان وكمان .. وطبعاً لو انت كان عندك ذرّة من العقل أو العلم كنت ح تعرف إن فلوس الشعب حاجة وفلوس الحكومة حاجة تانية وفلوس الجيش حاجة تالتة خالص .. وبعدين انت لو فكّرت شويّة ح تلاقي المشروع الهايل ده ح يغطي مصاريفه قوام .. شوف يا سيدي :

·      أولاً : ح يخلق فرص عمل لمئات من السادة الضبّاط وأمناء الشرطة والعساكر والموظّفين بوزارة الداخليّة وأمن الدولة (لا مؤاخذة .. قصدي الأمن الوطني) .. يعني رواج وظيفي أهو.

·      ثانياً : السجن ده ح يستوعب الآلاف من السجناء والمعتقلين الحاليين اللي يا عيني مزنوقين كل عشرة ف زنزانة واحدة .. فوائد نفسيّة أهي.

·      ثالثاً : ح يستوعب السجناء والمعتقلين المحتملين اللي أعدادهم ح تزيد الفترة الجايّة خاصةً إننا داخلين على مرحلة دقيقة ومنعطف تاريخي .. فوائد سياسية أهي.

·      رابعاً : شوف بقى الآلاف دول ح يشغّلوا الكانتين بتاع السجن قد إيه .. إشي سندوتشات وإشي بسكوت لوكس وإشي بالعجوة وإشي شيبس وإشي بيبس و إشي سجاير .. يعني رواج اقتصادي أهو.

·      خامساً : طبعاً الآلاف دول ح ييجيبوا ملايين من أهلهم يزوروهم ومعاهم العيش بالحلاوة .. والملايين دول ممكن يحتاجوا يقعدوا في الفنادق والمنتجعات اللي حوالين السجن كام يوم على بال ما يطلّعوا تصاريح الزيارة وياخدوا دورهم في طابور الزائرين .. يعني كمان رواج سياحي وتعميري أهو.

·      سادساً : مش ح اتكلّم بقى عن ازدهار صناعة العيش والحلاوة بأنواعها يا كوتش واللي ممكن نخصّص لها منطقة صناعية مجاورة لمصانع الحلاوة وأفران العيش أبو مسامير .. أو استحداث مصانع متطوّرة لعمل السندوتشات الجاهزة للحلاوة خاصةً الحلاوة بالقشطة .. رواج صناعي أهو.

·      سابعاً : بدل ما الشعب قاعد ع القهاوي مش لاقي شغل وعمّال يهلفط بالكلام في السياسة الأحسن يتلم ف السجن الكبير ده الحلو ده .. ع الأقل ح يبقى واكل شارب نايم ببلاش .. فوائد اجتماعية أهي.

·      ثامناً : مش ح اقول لك بقى على التأثير الإيجابي لهذا السجن بالنسبة للقضاء على الإنفجار السكاني خصوصاً بعد سجن الرجال وعزلهم عن زوجاتهم .. ومش ح اشرح أكتر من كده علشان باتكسف .. فوائد سكّانية أهي.

باختصار المشروع ده المفروض يتعمّم في كل المحافظات علشان الكل يستفيد والسجون تستوعب المزيد والمزيد (بس على الله تقضّي) ولو حتى بنظام الـ B.O.T. أو بنظام الـ P.P.P. أوحتى بنظام البي بي أو الكا كا .. وربنا يخلّيكم لنا ويجعله عامر بحِسّكم على طول قادر يا كريم .. خد من قلبي وصُر.

google-playkhamsatmostaqltradent