خبر
أخبار ملهلبة

المثلبة (الرذيلة) الثالثة والعشرون: الحَسَدُ والحِقْدُ والطَمَعُ في ما للغَيْرِ واسْتِعْداءُ الناجِحينَ وإعْلاءُ كَلِمَةِ "إشْمِعْنى" دونَ سَبَبٍ مَنْطِقيٍ مَعْقول | سخصية مصر

 


عُيون

 

 

دَخَلَ الزَوْجُ بَيْتَهُ بَعْدَ مُنْتَصَفِ اللَيْلِ فَخَلَعَ حِذاءَهُ وفَتَحَ بابَ غَرْفَةِ ابْنَتَيْهِ ليَطْمَئِنَ عَلَيْهِما فَوَجَدَهُما تَغُطَّانِ في سُباتٍ عَميقٍ فَيَمَّمَ وَجْهَهُ شَطْرَ غُرْفَةِ نَوْمِهِ ليَنامَ هوَ الآخَرُ بَعْدَ عَناءِ يَوْمِ عَمَلٍ طويل، وفوجِئَ الرَجُلُ بِزَوْجَتِهِ ساهِرَةً تَنْتَظِرُهُ عَلَى غَيْرِ العادَةِ بَلْ تَعَجَّبَ أكْثَرَ عِنْدَما رَأَى هَيْئَتَها هَذِهِ اللَيْلَةَ فَسَأَلَها باسْتِغْرابٍ وهوَ يَتَفَحَّصُها مِنْ قِمَّةِ رَأْسِها إلَى إخْمَصِ قَدَمَيْها :

- سَلامُ عَليكُم.. إيه يا ولِيَّه اللي مصَحِّيكي لِغايَة دَه الوَقْت؟.. مِشْ بعادَة يَعْني.. دَه انا كُل يوم آجي مِ الشُغْل أَلاقيكي بِتْشَخَّري فِ سابِع نومَة.. وإيه اللي انْتي عامْلاه فِ نَفْسِك دَه؟.. لابْسَة قَميص نوم شِفْتِشِي وعامْلَة شَعْرِك موظامْبِليط وراسْمَة فِ وِشِّك بالأَحْمَر والأَخْضَر زَيْ عَروسِة المُولِد وحاطَّة ريحِة خَمَسْ خَمْسات.. هُوَّ النَهارْ دَه إيه فِ الأَيَّام؟

- يَعْني هوَّ انا كِدَه وِحْشَة يا خويا؟

- مِشْ القَصْد.. بَسْ فيه حَاجَة؟.. عايْزَة إيه بالظَبْط؟

- أَعوزَك طَيِّب يا سِيد الرِجَّالَة.. هُوَّ انْتَ مخَلِّي نِفْسِنا فِ حَاجَة؟

- هاتي مِ الآخِر يا وليَّه.. بَلاش تِضْحَكي عَلَى دَقْنى.. أَنا جاي مَهْدود مِ الشُغْل وعايِز اتْخِمِد لي كام ساعَة قَبْل ميعاد الشُغْل بِتاعْ الصَبْح.

- يا ساتِر يا راجِل.. يَعْني هوَّ لازِم يبْقَى فيه حَاجَة عَلَشَان اتْزَوَّق لجوزي حَبيبي.

- يا وليَّه انْجِزي.. هوَّ انا يَعْني مِشْ عارْفِك لَمَّا تعوزي حَاجَة؟

- بَصَراحَة كِدَه يا خويا الغَسَّالَة النُصْ أُوتوماتيك بِتاعِتْنا دي ما بَقِتْش نافْعانا.. أَنا عايْزاك تِشْتِري لنا واحْدَة فول أُوتوماتيك.

- لا فول أُوتوماتيك ولا فَلافِل أُوتوماتيك.. مِنين يا حَسْرَة.. آدي الله وآدي حِكْمِتُه.. إعْقَلي يا "عيون" عَ المِسا.

- أَعْقَل!.. ليه يا خويا شايِفْني باشِّد فِ شَعري.. ولّا يمْكِن مَهْبوشَة.. هيَّ الوِليَّه المَعْدولَة "خَميسَة" اللي فِ العِمارَة اللي فِ وِشِّنا أَحْسَن مِنِّي ولّا زايْدَة عنّي إيد أَوْ رِجْل؟.. إشْمِعْنى هيَّ جُوزْها جاب لَها غَسَّالَة فول أُوتوماتيك بالقِسْط؟.. وكُل يوم تنَشَّر قُدَّامي الغَسيل زَيْ ما تْكون بِتْغيظْني.. دي حَتَّى امْبارِح وانا باسْأَلْها عَلَى مارْكِة الغَسَّالَة قالِت لي إنَّها "توشيشا الخَشَبي" أُمْ زَرايِر مدَوَّرَة وفيها فِلْتَر بيِمْنَع دخول الحَصْوَة اللي فِ المَيَّه وبِتْشيل لِغايِة خَمْسَة كيلو هدوم.. بِنْت الكَلْب فاكْراني مِشْ فاهْمَة قَصْدَها إيه بالخَشَبي والمدَوَّرَة والحَصْوَة وخَمْسَة كيلو.

- يا سِتّي.. أَقْرَع بياكُل حَلاوَة قال بِفْلوسُه.. إنْتي مالِك بيها؟.. هوَّ احْنَا قَدَّهُم؟.. عَلَى رَأْي المَثَل : "الفِقِي ياكُل ويِتْلَدِّد والمَيِّت يِنْشَف ويِتْقَدِّد".. إحْنَا يا دوب ناكُل ونِشْرَب ونرَبِّي البِنْتين ويَبْقَى بارَك اللهُ فيما رَزَق.

- وهوَّ جوزْها يزيد عَنَّك إيه؟.. دَه انْتَ حَتَّى بتِشْتَغَل شُغْلانْتين مِشْ واحْدَة زَيُّه.

- آه بَسْ شُغْلِتُه بعَشَرَة.. دَه ما شاءَ الله سِمْسار.. يَعْني بيْجِيب فُلوس قَدْ كِدَه مِ الهَوا.. إنْتي ما بِتْشوفيهوش كُل يوم يرْجَع بيتُه محَمِّل إزّاي؟.. وبيْلَبِّس عيالُه غالي إزّاي؟.. وموَدِّيهُم مَدارِس خاصَّة نضِيفَة.. غير إنْ عَنْدُه عَرَبيَّة مِيَّة تَمانية وعِشْرين ميتاليك.. أَنا فين وهوَّ فين؟.. جَتْنا نيلَة فِ حَظِّنا الهِباب.

- يَعْني مِشْ حَ تجيب لي الغَسَّالَة؟

- فِ الجَنَّة ونَعيمْها إنْ شاءَ الله.. قومي كِدَه اسْتَهْدي بالله واقْلَعي القَميص دَه والْبِسِي الجَلابيَّة المقَرَّحَة بتاعِة كُل يوم وفُكِّي شَعْرِك.. وقَبْل ما تنامي روحي اغْسِلِي وِشِك يمْكِن المِكْياج اللي انْتي حاطَّاه يطْلَع.. دَه انْتي وِشِّك عايِز لُه نُصْ لِتْر تِينَر عَلَشَان ينْضَف مِ البُويَة اللي عَليه.. وشوفي لِك طَريقَة تِخْلَصي بيها مِنْ أُمْ الخَمَس خَمْسات اللي انْتي مغَرَّقَة نَفْسِك بيها دي.. بِتْفَكَّريني بريحِة أَبويا الله يِرْحَمُه ساعِة ما كُنَّا بِنْغَسِّلُه.

- إهئ إهئ.. ماشي.. أَهُو انْتَ كِدَه.. عُمْرَك ما نَصَفْتِني أَبَداً وكاسِر نِفْسِى عَلَى طول.. إنَّما "خَميسَة" الغَيَّاظَة دي اللي قاهْراني رَبِّنَا حَ يآتيها بمُصيبَة عَلَشَان يخَلَّص لي مِنْها اللي بتَعْمِلُه فيَّ.. بِنْت الصَرْمَة.

وفي الصَباحِ الباكِرِ اسْتَيْقَظَتْ "عيونُ" لِتُشْرِفَ عَلَى ذِهابِ بِنْتَيْها للمَدْرَسَةِ فَوَجَدَتْ الكُبْرَى تَكْتُبُ باقي واجِبِها فَصاحَتْ فيها مُؤَنِّبَة :

- تَوْ ما بتِعْمِلي الواجِب بِتاعِك دَه الوَقْت يا مَوْكُوسَة.. حَ تِتْأَخَّري عَ المَدْرَسَة يا مَفْضوحَة.. ما عَمَلْتيهوش امْبارِح ليه يا خايْبانَة.. خَلِّي المُسَلْسَلات التُرْكي تِنْفَعِك يا كاتيانَة.. وإيه القَلَم اللي انْتي بتِكْتِبي بيه دَه؟.. جِبْتيه منين؟

- دَه مِشْ بِتاعي.. دَه بِتاعْ "مَحْروسَة" بِنْت طَنْط "خَميسَة".. أَخَدْتُه مِنْها لَمَّا رُحْتْ عَنْدَها أَوِّل امْبارِح مِنْ غيرْ ما تحِسْ.. شُفْتي حِلْو إزّاي؟

- يسْتَخارِك.. سَرَقْتيه يا بِتْ؟

- ما هِى عَنْدَها أَقْلام تانيَة بالهَبَل وأَحْلَى مِنْ دَه كَمان.. إشْمِعْنَى هيَّ أَحْسَن مِنِّي فِ كُل حَاجَة.. بتِلْبِس زِيْ مَدْرَسَة جِديد وشَنْطَة جِديدَة وبتِلْبِس دَهَب ياما وكَمان عَنْدَها موبايل "فوكيا 6600".. حَتَّى فِ الامْتِحانات بِتِطْلَع الأولَى.. دَه حَتَّى رَبِّنَا ما يِرْضاش بكِدَه.

- هــاتي يا بِتْ القـَـلَم دَه.. أَنا حَ اكْسِــرُه وارْميه فِ الكَبانِيه.. وتاني مَرَّة ما تِعْمِليش كِدَه يا بِنْتِ الحَراميَّة.

وما إنْ رَاقَبَتْ "عيونُ" ابْنَتَيْها وهُما تَهْبِطانِ آخِرِ دَرَجاتِ السُلَّم ودَخَلَتْ شَقَّتَها وأَغْلَقَتْ عَلَى نَفْسِها البابَ حَتَّى سَمِعَتْ صُواتاً عالياً وجَلَبَةً صادِرَةً مِنَ الشارِعِ فانْدَفَعَتْ نَحْوَ الشُرْفَةِ تَسْتَطْلِعُ السَبَبَ فَشاهَدَتْ دُخَّاناً كَثيفاً يَنْبَعِثُ مِنْ نافِذَةِ الحَمَّامِ الخاصَّةِ بشِقَّةِ "خَميسَة"، ثُمَّ لَمْ تَلْبَثْ أَنْ انْقَضَتْ دَقيقَةٌ حَتَّى هَدَرَتْ أَصْواتُ سارينَةِ سَيَّاراتِ الإطْفاءِ والإسْعافِ مُهْرِعَةً لِمَكانِ الحَريق، وعِنْدَما سَأَلَتْ "عيونُ" إحْدَى الجاراتِ - التي كانَتْ تُشاهِدَ ما يَحْدُثُ هيَ الأُخْرَى - عَنْ سَبَبِ الحادِثِ أَجابَتْها وهيَ لا تَسْتَطيعُ أنْ تُخْفي شَماتَةً سَيْطَرَتْ عَلَيْها :

- دي شَقِّة "خَميسَة" اللي مَسَكِت فيها النار.. أَصْلَها البِعيدَة قايْمِة مِنْ آدانات رَبِّنَا تِغْسِل هُدوم جوزْها وعيالْها عَ الغَسَّالَة الفول أوتوماتيك الجِديدَة عَلَشَان تغيظْنا.. قام حَصَل ماس كَهْرَبا مَسَك فِ الغَسَّالَة وقَوِّم فيها حَريقَة.

فَرَدَّتْ عَلَيْها "عيونُ" وهيَ تُمَصْمِصُ شَفَتَيْها :

- مِصْصْصْ.. شوفي ياخْتِي الوِليَّه الـمُبْخَتَة.. جات لها تَلات عَرَبيَّات مَطافي وعَرَبيِّة إسْعاف.. إشْمِعْنَى "أُمْ عَبْدُه" لَمَّا شَقِّتْها اتْحَرَقِت ما جات لَهاش غير عَرَبيِّة مَطافي واحْدَة يتيمَة؟.. حُظوظ.

google-playkhamsatmostaqltradent