خبر
أخبار ملهلبة

إبني لفوق | فؤاد حداد

الصفحة الرئيسية



إبني لفوق .. إمشي لقُدّام

 

 

إبني لفوق .. إمشي لقُدّام

"مصر" نهارها وليلها جَميل

كل الأرض لبَعض تميل

كل حدودها بطَعْم النيل

تتحقّق بينا الأحلام

إبني لفوق .. إمشي لقُدّام

 

"مصر" ف عينها دموع الفرحة

ضَيْ جبينها تحت الطَرحة

بينوَر للأرض الطارحة

قَمح وفُل وخير وسَلام

إبني لفوق .. إمشي لقُدّام

 

"مصر" حياتي وحِلْم حبايبي

من حبّها أنا راضي بنايبي

نورها ف عيني ونورها ف قلبي

بيني وبينها أرق كلام

إبني لفوق .. إمشي لقُدّام

 

إهتف للحق المنصور

والسما ف جناح العصفور

"مصر" تشُق طريق النور

ما تخلّيش ف الدُنيا ضلام

إبني لفوق .. إمشي لقُدّام

 

 

فؤاد حدّاد

google-playkhamsatmostaqltradent