خبر
أخبار ملهلبة

ما بين عفونة الإعلامي الأمين ودهشته من ثراء المسريين



ما بين عفونة الإعلامي الأمين ودهشته من ثراء المسريين

 

 

ملاحظات على فيديو المدعو "تمّورة لا مؤاخذة أمين":

·       كلامك صحيح وحقيقي عن أسعار الأسماك اللي نطت نطة مفاجأة ووصل تمنها للضعف في لحظة واحدة من كام شهر بس سيادتك نسيت تقول إن النَطّة دي حصلت تاني يوم افتتاح المزارع السمكية بكفر الشيخ في 18 نوفمبر الماضي (قبل هذا الفيديو) .. وللآن ما شفناش أي إنتاج له مردود إيجابي على سوق الأسماك رغم جهود السادة القوّاد المقاتلين القائمين على خطوط المشروع.

·       كلامك وتلميحاتك عن غباء الشعب المسري وسوء تصرفاته برضه صحيح ولا تحتاج إلى دليل أكبر من كونك مذيع يحترمه هؤلاء الأغبياء رغم أنك يومياً تتقيأ من فمك وتتمخّط من أنفك سموم أفكارك وأفكار من سلّطوك علينا.

·       اندهاشك من إنفاق عشرة جنيهات لكل فرد من الشعب (ده لو سلّمنا بإن شعب تعداده مائة مليون أنفق فعلاً مليار جنيه في يوم شم النسيم حسب الإحصائية الخزعبلية اللي ما اعرفش جبتها منين وكأنك لفيت على فسخانيّة مسر تحسب مبيعاتهم) يعكس صدمتك الشديدة من إن المواطن المسري لسّه معاه عشرة جنيه بعد الجهود الهائلة للحكومة في رفع الأسعار والتنغيص على أم الشعب لتجريده من أي قرش زيادة ممكن يصرفه على ملذات الحياة المحرّمة زي الفسحة في الجناين والعياذ بالله وشراء أطعمة أخرى (غير الفول والعدس) ممكن تهف عليه زي بقية خلق الله.

·       أحب أزيدك من الشعر كام بيت كده : الشعب المسري ابن التيت صرف في اليوم ده ربع مليار جنيه على شراء اللمون لزوم عصره على الفسيخ وربع مليار كمان على البصل الأخضر ونص مليار على العيش ونص مليار على تذاكر دخول جنينة الحيوان اللي وصلت خمسة جنيه رغم خلو الجنينة من الحيوانات فيما عدا البط والوز والحمام وحفنة من الزغاليل وبعض القرود مع الاعتذار لك ولبقية الإعلاميين .. وما تنساش كمان تحسب على الناس تمن فاتورة الميّه اللي شربوها بعد الفسيخ والرنجة واللي كمان استعملوها في السيفونات بعد هضم وإخراج هذه العفونة على حد قولك .. وكأننا بنصرف ونبعزق في فلوس الست والدتك.

·       لو الحكومة مش نايمة ولو فيه رقابة فعليّة على الأسواق وأسعار السلع من الجهات المعنية المنوط بها محاسبة كل من يرفع الأسعار ليتاجر بقوت الشعب ما كانش الشعب الغلبان دفع المليارات في السمك أبو ستين وهوَّ ما يساويش غير تلاتين والفسيخ أبو مية وخمسين وهوَّ ما يساويش غير ستين .. وكذلك اللحمة والفراخ والخضار والفاكهة والذي منه علشان يعرف يأكّل عياله ولو بالغلا والكَوَا .. أومّال ح ياكلوا طوب يعني؟

·       يا سيدي خلّي الشعب ياكل العفونة دي ويسيب لك إنت وأمثالك الكافيار والسيمون فيميه والسوشي .. إنت مستكتر عليهم شوية العفونة دي وسايب الإحصائية الرسمية للجهاز المركزي للتعبئة والإحصاء السنة اللي فاتت واللي بتقول إن أغنياء الشعب أمثالك بيصرفوا سنوياً  9.5 مليار جنيه على أكل القطط والكلاب مع الاعتذار لك ولرفاقك مرة أخرى.

google-playkhamsatmostaqltradent