خبر
أخبار ملهلبة

صباح الخير على ورودِك يا مصر | يا ريت نفتكرهم دايماً ونقرا لهم الفاتحة

الصفحة الرئيسية



صباح الخير على الورد اللي فتّح في جناين "مصر"

 

 

صَباح الخير على الوَرد اللى فتّح فى جناين "مصر"

صَباح العندليب يشْـــدي بألحان السُبوع يا "مصر"

صَــبـاح الداية واللَفّة .. ورَش المَلْح ف الزفّة

صَباح يطْلَع بأَعلامْنا من "القَلْعَة" لـ"باب النَصْر"

 

سَلامتِك يا امّه يا مُهْرَة

يا حَبَّالة يا وَلّادة .. يا سِـت الكُل يا طاهْرة

سَلامتِك من آلام الحيض .. من الحِرمان مِن القَهْرَة

سَلامِة نَهْدِك المُرْضِع .. سَلامِة بَطْنِك الخَضْرا

 

هَناكي وفَرْحِة الوالْدة تضُمّ الوِلْد يا والْدة

يصونهم لِك ويحميهم .. يكَبَّرْهُم يخَلّيهُم

يجَمّع شَـمْلُهُم بيكي .. يتَمِّم فَرْحِتِك بيهُم

 

صَباح الخير على ولادِك .. صَباح الياسَمين والفُل

يعيشوا ويفْنوا حُسّادِك .. ويسْقوهُم كاسات الذُل

 

وبَلّغ يا "سَـــــــمير غَطّاس" .. يا ضيف المُعْتَقَل سَنوي

بصوتَك ده اللى كُلّه نحاس .. صَباح الخير على الثانَوي

 

وأهلاً بيكوا ف "القلعة" .. ويا اللي ف الطَريق جايين

ما دامِت "مَصْر" ولّادَة

وفيها الطَلْق والعادَة

ح تِفْضَل شَمْسَها طالعة برغم "القلعة" والزَنازين

 

صَباح الخير على الوَرد اللى فتّح فى جناين "مصر"

صَباح العندليب يشْـــدي بألحان السُبوع يا "مصر"

صَــبـاح الداية واللَفّة .. ورَش المَلْح ف الزفّة

صَباح يطْلَع بأَعلامْنا من "القَلْعَة" لـ"باب النَصْر"

 

 

أحمد فؤاد نجم

google-playkhamsatmostaqltradent