خبر
أخبار ملهلبة

الفصل السابع (2) | نهاية العالم

 

الفصل السابع (2) | نهاية العالم

الفصل السابع (2) | نهاية العالم

 

 

- يا عم صور إيه.. ما خلاص ما عادش فيه داعي للنفاق زي الأوّل.. أنا قلت لهم يحطّوا ف البرواز الكبير الفاضي ده علم مصر والبروازين الصغيّرين دول صورة واحد صعيدي من عامّة الشعب وهوّ بيبص للسما وصورة تانية لجامع جنب كنيسة.

- ماشي.. خش ع الصفحة التانية بقى.

- الصفحة التانية زي ما انت شايف كده ح يبقى فيها أخبار المذنّب "المُهْلِك" والبُعْد الباقي بينه وبين الأرض ومجموعة من الأخبار الثانويّة العالميّة والمحليّة.. زائد بواقي واستكمالات الصفحة الأولى.

- تمام.

- الصفحة التالتة بقى ح فيها تحقيق صحفي هايل لشاب كان ح يبقى له مستقبل كبير لو ما كانتش القيامة ح تقوم.. التحقيق ده إسمه "كرسي الإعتراف".. عبارة عن اعترافات مسئولين كبار بأخطائهم وخطاياهم ف السنين اللي تولّوا فيها المسئوليّة.

- معقول!!.. والمسئولين دول رضوا يعترفوا بالسهولة دي؟

- طبعاً ما كل واحد فيهم عايز يخلّص ذمّته من ربّنا ويرمي حموله ويفضفض قبل الآخرة.. ده فيه واحد كان رئيس لجنة الاقتصاد ف مجلس الشعب اعترف بإنّه كان بيكسب الانتخابات كل دوْرة بالتزوير.. وواحد تاني كان وزير البترول قر بالتلاعبات ف عقود تصدير الغاز الطبيعي والبترول المصدَّر للخارج.. ووزير الإسكان اللي كان مربّي دقنه قد كده وزبيبة الصلاة واكله نص وشّه وكنّا بنقول عليه بتاع ربّنا طلب م الشعب يسامحه ع الأراضي اللي اشتراها لنفسه ولعياله برخص التراب وباعها بعد كده بأضعاف مضاعفة لمّا دخّلها كردون المباني بقرار منّه شخصيّاً.. غير باقي المسئولين اللي ردّوا الأراضي والهدايا والرشاوي والفلوس اللي استولوا عليها بدون وجه حق بعد ما استغلّوا سلطتهم ونفوذهم ف مخالفة القانون.

- يا نهار إسود.. دي الدنيا كانت بزرميط خالص.

- أومّال يا بني.. هوّ انت فاكر إنّنا احنا اللي بايظين بس.. ده البوظان مالي البلد على آخرها.

- إيه ده.. فين باب الفن بتاعي اللي ف الصفحة الرابعة؟

- يعني هوّ انت كتبت حاجة ف الباب بتاعك واحنا ما نشرنهاش؟

- أعمل إيه.. ما هو تصوير الأفلام والمسلسلات كلّها اتوقف.. والفنّانين يا إمّا سافروا "السعوديّة" يعملوا عمرة يا إمّا سافروا يقضّوا الكام يوم اللي فاضلين مع أهاليهم ف البلد يا إمّا تابوا واترزعوا ف بيوتهم زي بقية الناس يستغفروا ربّنا قبل ما تقوم قيامتهم.. تفتكر فيه حاجة تنكتب؟

- ما هو علشان كده لغينا الباب الفنّي من الصفحة الرابعة وباب الأزياء والموضة من الصفحة الخامسة وأخبار الحوادث من الصفحة الساتّة وخلّينا الباب الديني والإسلاميّات من الصفحة الرابعة للساتّة.. ما هو كل الناس ده الوقت بقت اهتماماتها ف الدين وبس.. مين فاضي يتابع الموضة ولّا الكلام الفارغ ده.. كل الستّات إتحجّبوا أو غطّوا راسهم وبقوا بيلبسوا عبايات وفساتين ماكسي زحّافة لغاية الأرض بكمام طويلة.. حتّى الحوادث اختفت.. ما بقاش فيه سرقة ولا قتل ولا حتّى خناقة توحّد الله فيكي يا "مصر".. دي اقسام الشرطة قفلت يا مؤمن.

- بس مش كتير تلات صفحات دين.. ح تحط فيهم إيه دول؟

- لا كتير ولا حاجة.. ده انا بافكّر أخلّيهم خمسة.. مكان الإعلانات المبوّبة وسوق السيّارات اللي ما بقاش فيهم حاجة.. والخمس صفحات ح تبقى فيهم حتت من القرآن والأحاديث النبويّة ومقالات في العبادات والمعاملات والشريعة والسيرة المحمّديّة وقصص الأنبياء وفتاوي وردود من الشيوخ على أسئلة القرّاء.. إلخ ألخ.. ده انا كنت بافكّر كمان أعمل صفحة دينيّة للإخوة المسيحيّين.. وح نبقى احنا الوحيدين اللي خصّصنا صفحة للدين المسيحي.. ما هو بيني وبينك من حقّهم تبقى لهم صفحة ف أي جرنال ولو حتّى صفحة إسبوعيّة.. بس المشكلة إني ما لاقتش حد مسيحي متخصّص أعرفه يحرّر لنا المادّة بتاعة الباب ده ف الوقت الضيّق اللي فاضل.. فاضطرّيت ألغيه وخلاص.

- طب وبالنسبة للصفحة السابعة والتامنة؟

- أهِه.. فيها أخبار الرياضة: "إلغاء الدوري العام وكأس مصر".. "اللاعب الخلوق أبو طريشة يعترف بالحصول على ضربات جزاء وهميّة دون وجه حق بعد تمثيله وإدّعائه السقوط داخل منطقة الجزاء في أغلب المباريات الهامّة ويطلب الصفح من المنافسين".. "إستقالة لجنة الحكّام باتّحاد الكرة بعد إقرار معظم الحكّام بمجاملة ومحاباة النادي الأهلي وحصولهم على الرشاوي من الأندية المهدّدة بالهبوط".. "الأهلي يهدي الزمالك درع الدوري للتكفير عن حصوله على العديد من البطولات التي لا يستحقّها".. "لأوّل وآخر مرّة في التاريخ مجلس إدارة الزمالك ينعقد بالكامل دون حدوث معارك وشتائم وإصابات".. "بعد التأكّد من نهاية العالم المشاهير يفصحون عن هويّتهم الرياضيّة بصدق ويبتعدون عن الدبلوماسيّة".

- طب ما تخلّي باب الرياضة ف التامنة والتاسعة علشان يبقوا ف وش بعض.. وخلّي السابعة لأخبار المحافظات.

 

 

(يتبع)


google-playkhamsatmostaqltradent