خبر
أخبار ملهلبة

كلب الست | أحمد فؤاد نجم

الصفحة الرئيسية



كلب الست

 

 

ف الزمالك من سنين

وف حِمى النيل القديم

قصر من عصر اليمين

مِلك واحدة من الحريم

صيتها أكتر م الأدان

يسمعوه المسلمين

والتَتَر والتُركمان

والهنود والمنبوذين

سِت فاقت ع الرجال

ف المقام والاحترام

صيت وشهرة

وتَل مال

يعني في غاية التمام

قُصْرُه يعني هيَّ كلمة

ليها كلمة ف الحكومة

بس ربّك لاجل حِكمة

قام حرمها م الأمومة

والأمومة طبع ثابت

جوّه حوّا من زمان

تعمل ايه السِت جابت

فوكس رومي ولُه وِدان

فوكس ده عقبال أمالتك

عنده دستة خدّامين

يعني مش موجود ف عيلتك

سخص زيّه يا اسماعين

واسماعين ده يبقى واحد

م الجماعة الغلبانين

اللي داخوا ف المعاهد

والمدارس من سنين

حَب يعمل واد فكاكة

ويمشي حبّة ف الزمالك

والقيامة والفتاكة

يرموا طبعاً ع المهالك

عم سُمعه من قَيامته

حَب يعمل فيها فِلّة

بعد ما قلوظ بيجامته

اشترى حِتّة مجلّة

قول مشي بيقرا ف حكاية

من حكايات الغرام

و اندماجه ف القراية

خلّى مَشْيُه مش تمام

ع اليمين يحدف بعيد

خطوتين ويروح شمال

لمحه فوكس م الحديد

قال ده صيد سهل وحلال

هَب نَط ف كِرشه دوغري

جاب بيجامته لحد ديلها

إسماعين بدال ما يجري

قال يا رجلي .. رجلي ما لها

بص شاف الدم سايح

من عاليها ومن واطيها

ويا اللي جاي ويا اللي رايح

المجلّة مش لاقيها

حبّة واتلموا الظنايا

اللي همَّ البوّابين

و الحكاية والرواية

قال لهم: ده كلب مين؟

كلب مين ما كلب مينشي

سُمعه لبّخ حبّتين

قال له واحد فيهم امشي

اللي جابك عنده مين

قال ده شارع يا مواشي

للجميع .. راكب وماشي

كلمة من ده وكلمة من ده

ظاطوا واترسمِت فضيحة

قول نهايته والقصد من ده

إسماعين أكل الطريحة

راحوا قسم الشرطة طبعاً

والنيابة كفيلة بيهم

واترموا ف الحَجز جَمْعاً

لمّا ييجي الدور عليهم

حَبّة والشاويش أمين

قال: سعيد النقشبندي

قام غريم عم اسماعين

قال له: محسوبك يا افندي

قام سي سُمعه يروح معاه

الشاويش قال غور بدمّك

راح تعوصني وفوق قفاه

كَف طَرقَع: داهية ف امّك

تفتكر يفضل سي سُمعه

قد إيه ف القِسم نايم

استضافُه الحجز جُمعة

يا بلاش .. آدي العزايم

شاف بلاوي ما تِنحكيش

م الهفايا المحبوسين

قال يا عالَم .. يا شاويش

يا نيابة .. يا مسؤولين

خلّصوه بعد المناهدة

جُثّة من جُـحْر الديابة

هيَّ يمكن ساعة واحدة

كان ف مكتب النيابة

قال له: ما لك يا اسماعين؟

قال له: زي البُمب ما لي؟

قال له: عَضّك فوكس فين؟

قال له: سيبني أروح لحالي

إنت شوف سي فوكس يمكن

خَد تسمُّم غَصب عني

الوكيل قال: برضه ممكن

والشاويش قعد يغنّي

هييييص يا كلب السِت هيص

لك مقامك ف البوليس

بكرة تتولّف وزارة للكلاب

ياخدوك رئيس

إنت تِسوى ف النيابة

تُسعميّة م الغلابة

طب يا ريت يا فوكس كنا

و لّا تربطنا القرابة

إنت فين والكلب فين

إنت قَدُّه يا اسماعين

طب ده كلب السِت يا ابني

وانت تطلع إبن مين

بُشرى لاصحاب الديول

ولــللي له أربع رجول

بُشرى لسيادنا البهايم

من جمايس أو عجول

اللي صاحبه يا جماعة

له أغاني ف الإذاعة

راح يدوس فوق الغلابة

والنيابة بالبتاعة

هيص يا كلب الست هيص

هيص يا كلب الست هيص

 


أحمد فؤاد نجم

google-playkhamsatmostaqltradent