خبر
أخبار ملهلبة

كلمتين لـ"مصر" | أحمد فؤاد نجم

الصفحة الرئيسية

 


كلمتين لـ"مصر"

 

 

كل عين تعشق حليوة

وانتي حلوة ف كل عين

يا حبيبتي قلبي عاشق

واسمحي لي بكلمتين

كلمتين يا مصر يمكن

همَّ آخر كلمتين

حَد ضامن يمشي آمن

أو مِآمن يمشي فين

 

شابّة يا ام الشَعر ليلي

والجبين شَق النهار

والعيون بحرين أماني

والخدود عسل ونار

واللوالي ف ابتسامتك

يحكوا أسرار المحار

يا اللي ساكنة القصر عالي

إمتى يهنا لي المزار

كلّميني يا صبيّة

طال عليَّ الانتظار

كلمتين يا مصر يمكن

همَّ آخر كلمتين

حَد ضامن يمشي آمن

أو مِآمن يمشي فين

 

قصرِك المسحور غيلانه

أغبى من دود الغيطان

بعد مَص الغصن الاخضر

ينحتوا عضم العيدان

واللي خلّى الأرض خضرا

واللي خلّى الدار أمان

عاش بجوعه ملو جوفه

مات بخوفه م الغيلان

روّح الغلبان ما قالشي

عن شقا العمر اللي كان

كلمتين لمصر يبقوا

همَّ آخر كلمتين

حَد ضامن يمشي آمن

أو مِآمن يمشي فين

 

آدي كلمة من عذابي قلتها لِك

باقي كلمة من حنيني صُنتها لِك

 

ف الضلوع من دنيا ظالمة

كنت خايف يلمحوها

يقتلوها ف سكّة ضلمة

شقشقِت والنور بشاير

زهرة الصبّار يا سلمى

يا نسيم الشوق يا طاير

خُد لمصر الحلوة كلمة

طول ما يبقى الركب ساير

بالبصاير والعينين

يبقى ضامن يمشي آمن

يبقى شايف يمشي فين

 

 

أحمد فؤاد نجم

google-playkhamsatmostaqltradent